19kihu Atileetiksete Shaampiyooni beeqqaano ikkitannori Itophiyu Atileetikse Gobboomittete Gaamo bero barra Hangaari Budapesete hadhino. Tini gaamo Hangaari hadhinohu babbaxxitino doychonni beehante ikkanna; bero barra geegissinoonninsa. Kalqete Shaampiyooni battalara 800 meetirenni kayise (seennunni) Maratoonete geeshsha noo xeertinyinni heewisantannoti Itophiyu gobba haammata medaaliya gamba assitanno yine agarranni.
Sai diro Ameerikaho Origooni harinsoonni shaampiyoonira 10 meedaliya borreessiissinoti Itophiyu gobba kalqetenni 2ki deerra amadde jeefissinoti qaangannite. Barrubbate gedensoonni hanafamanno shaampiyoonira Itophiya riqibbinno gaamo gumaamma ikkite higate dandiisiisannonsa qixxaawo saiha mitto agana ale ikkitanno yannara qajeeltanni keeshshitino.
Gaamo qixxaawo jeefisse heewote barra agadhitanni nooha ikkanna; bero barra Budapeste geegiissinoonninsa. Shaampiyoonaho baxxinohunni, seedu xeertinyi heewonni sekkinonsa gobbuwa giddo gaamantannoti Itophiyu, shaampiyoonete dhaggenni mitte heewo agurranna baalante heewora beeqqaancho ikkitino.
Konni shaampiyooni aana Itophiyu Gobboomittete gaamo 6 seendillinni 19 seennenna 16 labballo xaphoomunni 35 Atileetootinni beeqqaano ikkitannoha ikkanno. Gaamo Budapesete hadhannohu 7 doychonni ikkanna; xeertinyinsanninna noonsa pirogiraame garinni beenkoonni.
Konne harunse, gaamote albi oyimbarra geegote aana noo pirogiraamera baandeera aate pirogiraame harinsoonni. Pirogiraamete aana IFDR Woganna Ispoortete Ministeere Ministirchi Kalaa Qajeeli Merdaasihu, Itophiyu Olompike komite Pirezidaante Dr Ashshebbir Wolde Giyorgisi, Itophiyu Atileetiksete Federeeshiine Pirezidaantitte Kaa`laancho Komishiinere Deraartu Tullutinna loosu gumulsiisaano komite afantino.
Gaamo albi gede gumaamma ikkite higgannota battalate qummeessinoonniha ikkanna; Itophiyu Atileetikse Federeshiine Layinki Pirezidaantichinna Gaamote Massagaanchi Atileetichu Gezahenyi Aberrihu Atileetoota doorroonni garanna qixxaawo lainohunni xaphi yiino xawishsha uyno. Danchu gumi daanno yee ammanannotano xawisino.
Atileetootunna qajeelshaano sayissino qixxaawo gara lainohano kulino. Konni shaampiyonira beeqqaano ikkitino Atileetooti wole yannanni woyyaabbinoti wiinamu saate noonsarenna danchu dhuki aana noore ikkansanni assitino qixxaawonni dancha guma borreessiisa dandiitannota hexxosi xawisino.
Itophiyu Atileetiksete Federeeshiine Pirezidaantite Kaa`laancho Komishiinere Daraartu Tullu ise widoonnni; shaampiyoonete qixxaawo aana qeechansa fultino bissa galatte, gaamote dancha guma halchitino. Itophiyu Olompiikete Komite Pirezidaante Dr Ashshebbir Wolde Giyorgisi, dancha halcho halchinoha ikkanna; qeeltanno Atileetooti ledo halamatenni heewisantanno Atileetootira uynanni baraarshi luphi yiinohanna dancha ikkannota qaale eino.
IFDR Woganna Ispootete Ministere Ministirchi Kalaa Qajeela Merdaasa isi widoonni; gobbate malaate ikkinoha baandeera aate amuraate assino. Atileetotahono uyno. Geegiissote pirogiraame balanxe gobboommitte gaamo qixxawo assitu yannara Federeeshiinete Pirezidaantichi hattono bareedu Atileetichi Kumu roorrichi Hayile GebreSilaase qajeelshu baycho mare Atileetoota jawaachishino.
Hasaawisi yannara; ”Itophiyu Atileetooti ogeeyyete, busullaaddaho; busullaadda ikkitinoonniri baalu qeela danditinanni. Konne qajeelshu baycho callooti`ne doddinoonni. Ko`o kayinni haammata heewisamaano ledonna kaameeru albaanni doddinanni. Hiittenne yannara heewote barri daanno woyte qarrantinoonte, massinoonte. Waajjitinikkinni jawaattine dodde; xa heedhinoonni dhuki danchaho. Baalunku noo`neta dodanshote dhagge`ne harunsoommo. Addintanni danchaho. Itophuyu gobba`nera dhagge loosse.
Dodansho murci`ra hasidhanno. Murcidhiniro, hixamanyitine doddiniro qeelle ki`nete; qeelle ninkete, jawaatte. Doobbiichu 24 saate giddo 22 saate goxanno. Gattino lame saate giddo hasiisannosire afi`rate itannore ugaaxanno. Ki`neno tenne gattino`ne saate giddo seekkitine qixxaabbe. 22 saate goxxe; fooliishshidhe. Huluullantinoonte; qeeltinannina” yaanni gadesi beehe sokkasi sayisino.
Abrhaam Saamueel
Bakkalcho Woxawaajje 11, 2015 M.D
