Itophiyu Kalqete Atileetikise Shaampiyooni labballu maraatoone heewo aana haammata medaaliya adha dandiitino. Awuropu kiironni 1983 Fiinlaande Helsiinkete Atiletichu Kabbadi Baalchihu birrete medaliyinni hananfoonniti qeellete harinsho, Origeni Shaampiyoonira Atileeti Taamiraati Tolihunna Mosinnete Gerremew borreessantino 1 Culkinna Birrete medaaliyi ledo, battalate 12 medaaliya gamba assa dandiitino. Konni deerrinni, shaete aana Keeniyunna Ispeenetenni balaxante sayikkita fultino.
Bareedu Atileetichi Gezzahanyi Abbarrihunni, Leellisa Deesiisinna Taamiraati Tolinni borreessaminoha sase culka lende lee/6/ birrete medaaliyanna sase camote medaaliya labballunni adha dandiitino. Konne ikkinohura, Itophiyu battalate rossino qeelle sufisiisate hettisamaano gobbuwanni shota ikkitinokki jifo agartannose. 19ki Budapeste Kalqete Maratoone Shaampoiyoonira culka wole gobbara saayisse aa hoogate kaajjado heewo agartannosaha ikkanno.
Gamba yite qixxaawo assa hanaffunkunni mitto agana ikkino gaamo, babbaxino baycho qixxaawonsa kaajjishshe suffino. Tenne yannara Budapestete noo diilallo iibbadote; Itophiyaho qole hawado ikkinohura xiiwo kalaqirono Itophiyu ispoorte akkadaamera, Aqaaqi, Inxooxxotenna Sandaaffu gottiimu baychira qixxaawo assitanni no. Atileetootu xeertinyunni ganyite abbitino gumanna qeelle sufisiisate xa noo gari inja hoogirono; jifo dandaatenni gobbansa baandeera gotti assate jawaatte loossanni afantanno.
Itophiyu xeertinye jawimmatenni qeeltanno yine agarranni gobbuwa giddo umite. Qeeltanno yine heda dandiinoonni korkaati gaamote giddo noo hewisamaano ikkadda ikkitino daafiraati. Gaamo waajjishiishannota ikkasenni sae, seeda yanna gade afidhinonna duucha yannra qeeltino gaamooti; qoleno ikkadda qajeelshaanonni taktikete ledo ikkite qajeelsha adhitanni noo daafira jawa qeellete hedo uynoonninsa.
Niro Origenete aana Atileetichu Tamiraati Tolihunni borreessamino culki, qoleno Atileetichu Mosinnet Gerremehunni borreesaminohu Birrete medaliyino Budapesteteno lendannita dihuluullisanno. Wiinamu saate borreessiissinno atiletoota karsitinohu gobboomu gaamo, Awuropu kiironni 2018 Dubayete maraatoone aana qeelinohanna wiinamu saate borreessiisinoha Atileeticha Liuli Gebiresillaaseha, Tseggaye Geetaachoha, Caalu Deessipha, Seyifu Turiha, Mehamedi Isiha hattono Taamirati Toliha hanqaffino gamooti. Tini gaamo baala 2 saatenna 5 xiqqeessi saate woro borreessiissino atileetoota ikkitinohura Itophiyu gaamo qeeltanno yine balaxote hedo worroonni.
Awuropu kiironni 2020 Vaalenshiyu maraatoonera wiinamu saate anna ikkinohu Atileetichu Caalu Deesoomihu noo gaamo ikkasenni, tenne hedo worate dandiinoonni. Atileetichu Itophiyu Pireese ledo assino keeshshonni, kalqete shaampiyoonira danchu garinni qixxaawanni noota huwachishino. Gaamote giddo qixxaawo assitanni noo atileetooti danchu dhukinna wo`ma fayyimma aana noohura woyyaawino gumi daanno.
Gaamote miilla millimmonsa baxillunni ikkite harissanni no. Qoleno qajeelshaanote ledo dancha gede sumuu yite kakka`e qajeeltanni no. Niro dayino gumi hagiriisannoha ikkanna; tayxeno kaajjado gaamonna dancha qixxaawo assitanni noohura, qeelle dagganno. Konnira, qajeelshaano sumuu yitanno diilallo harunsatenni kaajjaddo qajeelsha uytanni afantanno. Heewote bayichi iibbado ikkirono; konne dandiine qeellannita ammanino.
Origeenu Atiletikisete Shaampiyoonira heewisame Culka abbinohu Atiletichu Taamiraati Tolihu, tenne gaamo giddo beeqqaancho ikke qajeelanni no. Kuni atileetichi Budapesteteno dancha guma abbanno yine agarranni. Isino konni shaampiyoonira dancha guma abbate wo`naalannota coy`rino.
Maratoonete gamo qajeelshaanchi Hajii Adeelohu isi widoonni, Itophiyu ledo hettisantannoti Keeniyu gobba ikkitanna, gobboomu gaamono no yinanni macca atiletoota beeqqaano assate karse noohura, heewote aana gaamo insa insa ledo hasaabbe sumuu yituro, nirinni woyyaawino gumi daanno yee ammanannota xawisino.
Abrhaam Saamueel
Bakkalcho Woxawaajje 4, 2015 M.D
