1970M.D xintantinoti Hawaasi Quchumi Lekkate Kowaase kilawe, 45-diro baala Hawaasi Quchumi teessaano kilawe ikkite sufa dandiitino. Tini kilawe 45 diri giddo kaajjado hewisamaancho ikkitanna; lame higge Itophiyu Primeerete Liige boowe kaysate dandiitino. Konninni qoqqowubbate kilabba giddo umi kilawe ikkano dandiitino. Hawaasi Quchumi lekkate kowaase kilawe lame higge boowe kaysa calla ikkikkinni, kaajjakdanna macca godo`laano gobboomu lekkate kowaase gaamo widira lossatenni jawa qeechase fultino.
Xaano konne dilaasase fulate kaajjite suffe hadhanni no. Saiha 2014M.D assinoonni Itophiyu Pirimeerete Liige heewora boowe kaysate noose hexxo muranturono; kaajjado hewisamaancho ikkite shoolki deerra amadde jeefissinoti qaangannite. 2015M.D boowe kaysate noose hixamanyenni jawaata godo`laano giddonninna gobbanni soorrite abbatenni heewo assiturono, boowe kaysa didandiitino. Ikkollana, konne dirono dancha gumaati yinanniha lamalki deerra amadde gumula dandiitino.
1996M.D na 1999M.D lame higge boowe kaysa dandiitinoti Hawaasi lekkate kowaase kilawe, Hawaasi Quchumi Ispoortete maatenna gobbate deerrinni dancha adhamooshshe afidhino kilaweeti. Ikkollana, Ispoortetete maate duucha yannara boowe kayissanno yite hexxo assidhurono, xaa geeshsha boowe kaysatenni xeertidhe no.
Tenne boowete goo’ro fulatenna Ispoortete maate hagirsiisate 2016M.D noo heewora may garinni shiqate qixxaabbanni nooro buuxate yine Hawaasi Quchumi Ispoortete Kilawera Qara Loosu Harisaancho ikkinoha Kalaa Utteessa Uggamoha hasaawinsoommo. Kalaa Utteessi, Kilawe daanno diro kaajjado heewisamaancho ikkte shiqqanno gede hawadi yannara haammata looso loonsanni hee`noonnita kulino.
Kilawe konni albaannino jawaata hewisamaancho ikkite suffanni noota kulinohu Kilawete Loosu Harisaanchi Kalaa Utteessi; xaano kilawe kaajjite heewisamaancho ikkitanno gede assate jawaatanna macca godo`laano soorrine kilawete giddora abbate looso loonsanni hee`noonnita xawisino.
Konne ikkeenna, Diredaawunni, Arbaamincetenninna, Faasili Kanami kilawenni mereerohonna gargarate baycho noo foonqe beeshshatenna wonshate godo`laano kilawete widira soorro assine abba dandiinoonnita buuxisino. Xaano woloota gobboomu kilawenninna Baara widinni soorrine abbate millimmo assinanni hee`noonnitano qummeessino.
Hawaasi Quchumi lekkate kowaase kilawe konni albaannino lophitanni noo godo`laano qara kilawe widira lossatenni afantino kilawe ikkitinota qaagiisse; tayxeno onte lophitanni noo kaajjadda godo`laano qara kilawe widira lossate filloonni.
Wolootta kilabbano lophitanni noo godo`laano filte qara kilawete gaamo widira lossa noonsa yee huwachishino. Korkaatuno, woriidinni lossinoonni godo`laano kilawete giddo haammata yannara owaante aa dandiitanno daafiraati yiino. Kilawe duucha yannra eo eessate qarri noonsaha ikkanna konne qarra tiratenna eo eessa dandiitanno godo`laano abbine 2016M.D dancha heewisamaano ikkine shiqate kaajjado qixxaawo assinanni hee`noonni.
Hawaasi Quchumi Kilawe wedella godo`laanonni ijaarantino kilawe ikkasenni albiha macca ikkino su`mase wirro qolate mootimmanna hajo la`annonsa bissa jawaatte loossanni noota Kalaa Utteessi coyi`rino. Kilawe, albillicho dhukase woxunninna wolqatenni kaajjite suffanno gede assate Hawaasi quchumi gashshooti jawa irko assanni noota kulinohu Kalaa Utteesi; quchumu giddo noo dureeyyenna Hawaasi Lekkate Kowaase baxillaanonna dukkisaano irko assitanno gede woshshatto assino.
Tenne yannara godo`laanote baantanni woxi kilawetenna quchumu gashshooti dhukira aleenni ikkinota qummeessinohu Loosu harisaanchi; godo`laanote baantanni baatooshshi seera agadhitino wodho qixxeesineenna baantanni gede assate mootimmanna hajo la`annonsa bissa loosa noonsata dhaamino.
Abrahaam Saamueel
Bakkalcho Maaja 27, 2015 M.D
