Kowaasete Xawira dhaggete dandoosi leellishatenni irksaanote wodana hagirsiisa dandiinohu eote ugaaxaanchi Saladiini Seidihu jeefote baxanno kowaaasenni baxxinota sa`u barrubbara egensiisino. Lemuu diri giddo lekkate kowaase heeshshosi assinohu Itophiyu Pirimeere liigenni kaayise Afiriku kilawete shampiyooni geeshsha albaanni massaganni owaante uyno. Itophiyu Lekkate kowaase giddono hambannikkitanna haammata daga dhaggeefachishino dhaggete eo kiirsiisino.
Saladiini Seidihu lekkate kowaase ragi’rinohu maatesiwiinni ikkanna; beeddakko godo`laancho ikkate harinshosi 13 dirinni pirojekte ei yannara hanafino. Noosiha dhuka lai`noti Muger Simintote kilawe “B” gaamo giddo easi harunse ispoorteet maate ledo egennamino. Hanafotenni gaamote eo kiirsiisa hanafirono; beeddakote godo`laancho ikkate harinsho kayinni haammata jifo noote. Wedellichu godo`laancho ikkasinni burraaqanno gari, kowaase aanno garinna eo eessate noosi hayyo haamata ispportete maate wodana hagiriissino.
Saladiini Seidihu gobbate gido sase kilawera godo`la dandiino. Jawa baycho iillanno gede dhukasi leellishinohu Qiduusi Giyorgisi kilawe giddooti. 1998 -2004 M.D geeshsha keeshshino yannanni 112 godol`e godo`latenni 41 eo eessino. Tenne kilawenni baxxe 2008- 2013 M.D geeshsha wole kilawera godo`le 15 eo kiirsiisino. Faradaasinu mine 12-diri keeshsho giddo Itophiyu Pirimeerete Liige boowe 2001, 2002, 2008 na 2009 M.D kaayisino. 2000 M.D 21 eonni luphiima eo eessinoha ikke baraa’rino. 2009 M.D KAF shaampiyoone Liigera jawa harinsho asse owaante aa dandiino. Konninni, Afirikaho kowaase godo`litanno 30 doorantino godo`laano giddo mitto ikkatenni dhaggesi borreessiisino. Konne ikkinohura, “Marawe duu’ranno” woy ‹‹መረብወጣሪ›› yine ledote su`ma su`minoonnisi.
Jimma Abbajifaariranna Sidaamu Buni Kilawe giddo godo`la dandiinohu Saladiini; gobbate giddo calla ikkikkinni baara widono ha`re godo`lino. 6 aganira Gibtsete Ali-Ahilranna Waadi Dagila, Aljeeriyu MS Aljersete hattono Awuropa ha`ratenni Beeljeemete Liirsete godo`lino bareedati.
Itophiyu Gobboomu gaamo giddo jawa owaante uynohu godo`laanchu Saladiini, gaamo riqiwe godo`la hanafino baycho gargaraasinete fooliishsho ho`le afi`ranno kowaase eote widira soorre duuchu dani qeellera dilaalasi fulino godo`laanchooti. 2005 M.D gobboomu gaamo 31ki diri gedensaanni Afiriku boowera kamballi yitanno gede jawa qeechasino fulinoho. Jeefoteno Suudanete ledo noo godo`lera Culka ikkitino eo kiirsiise Addisi Ababu istaadiyemera yaaddote giddo hee`re godo`le harunsanni noo irkisaanote wodana hagirsiisino.
Itophiyu Gobboomu Gaamo Biraazilete Kalqete Boowe filote heewo godo`lera gaamo sa’’a nafa hoogguro Saladiini gaamo kakkaooshshunni massaganni eo eessanni Itophiyu Gaamo 10 doorantino Afiriku gaamo giddo e`anno gede assino. Itophiyu Gobboomu gaamora 28 marro beeqqe godol`e 14 eo kiirsiisa dandiino.
Babbaxxitino kilabbanna Itophiyu Gobboomu gaamo giddo owaante uynohu Saladiini, haammata yannra iillitannosi gawajjonni lekkate kowaase heeshshosi jifo wo`mitinota assitinos. Ikkollana, Saladiini xawu aana leellishanno ikkadimmanna duucha baycho godo`lasi wole godo`laanonni baxxannoha assinosi. Xawu giddo dodatenni daafurannokkihu, burraaqqannohu, wolqa noosihunna xiiwote giddo hee`re heewo qeelatenni taalamannosihu dinoosiho. Eote hoowe giddo balaxe iillatenna xeertotenni kowaase rahotenni xiiwe massatenni dhaggete kowaase eessanno.
Saladiini Seidihu lekkate kowaase godo`lenni baxxinohunni Itophiyaho lophitanni noo kowaasete godo`laanora kakkaooshshe kalaqino. Kowaasete xawi giddo leellishannoti jawa ikkadimma lekkate kowaase baxillaano giddo ba’’annokki qagooshshe worino. Isi ikkadimma seekkite la’’anni lophitanni noo godo`laanora jawaante kalaqino. Itophiyu kowaase albillicho lophitanni hadhanno gede harumasino worino Saladiini.
Babbaxxitino kilabba giddonna Itophiyu gobboomu gaamo giddo owaante aanni keeshshinohu Saladiini, hedeweelcho lekkate kowaase godo`le agurinota macciishitino ispoortete maate aana masille kalaqino. 2000 M.D kawa Itophiyu Lekkate kowaase giddo dooramino eote ugaxaano giddo mitto ikkinohu Saladiini, 20 diro kowaase godo`lanni keeshshi gedensaanni Koattesi sutinota faajje assi barri geeshsha Sidaamu Buni Lekkate Kowaase godo`laanchootinka.
Abrahaam Saamueel
Bakkalcho Maaja 20 , 2015 M.D
