Sulultu quchumira ijaarroonnihu Daraartu Tullu Ispoortete qajeelshinna xiinxallote mereershi uurrinsha muli yanna giddo maassiinseenna looso hanaffannota Oromiyu Qoqqowi Wedellunna Ispoortete Biiro egensiisino. Uurrinsha daanno diro ogeeyye gaammeenna qajeelsha hanafate qixxaawo assitanni no.
Olompikete bareeda Atileeticho kaa`laancho Komishiinere Daraartu Tullutenni su`minoonnihu Ispoortete qajeelshu uurrinshi ijaara 2008M.D hananfoonni. Sette diro keeshshi gedensaanni goofe loosu widira eate feeffate noota Oromiyu Qoqqowi Wedellunna Ispoortete Biiro Itophiyu Pireeste uurrinshara xawissino.
Sululutu quchumira 26 heektaare baatto aana ijaarroonniti jawa Ispoortete uurrinsha, Maaja agani 2015M.D maassiinseenna looso faajjetenni hanafanno. Aamamooshshu noore lophitanno wedella qajeelshinanni qoleno qoqqowoho noota Ispoortete xiinxallote mereersha ikke looso loossannotanna kaa`litanno uurrinsha ikkitinota qummeessinoonni.
Ijaaru loosi hanafami yannara 700 miliyoone birra baajeette amandoonniha ikkirono; xaa yannara 1.5 biliyoone birra iillinota kulloonni. Woxu lexxonna loosu xaa geeshsha keeshshate korkaati, ijaarranni uduunni waagi lexxo ikkinota xawinsoonni. Gatinohu ijaaru loosi albaanni noo aganna giddo jeefisamanno gede wo`naalsha assinanni hee`noonniha ikkanna; 2016M.D looso hanafate loonsanni hee`noonni.
Uurrinsha 2016M.D loosu widira eessate ogeeyye qaxarate looso hanaffinoha ikkanna; umi doychora 42 ogeeyye qaxarroonnita egensiissino. Ogeeyyenna qajeelaano calla agadhite nooti uurrinsha, onte Ispoortete daninni 200 Ispoortenyanna 80 ogeeyye amadde loosu widira e`anno.
Albillicho qoqqowu giddo qajeelshu aana noore 811 pirojekte aana illachiinshe qacale ooso doorrenna fille qajeelshu widira e`anno gede assinanni. Atileetikstenni, lekkate kaasenni, Voolibooletenninna wole Ispoortete daninni looso hanafate hasiisanno uduunne wonshinoonniha ikkanna; haaro diro qajeelsha hanaffanno.
Oromiyu Qoqqowi Wedellunna Ispoortete Biiro Layinki Sooreessinna Ispoortete Handaari Sooreessi Kalaa Dessaalenyi Xilahuni xawisino garinni; Uurrinsha maassiisate qixxaambe hee`noonnita coyi’rino.
Yannate ledo amadisiisame xeenu korkatinni badhera higino loosi nooha ikkanna; hakkuno tiraakete loosooti. Memennihu uminna laynki gafi loosi goofeenna sayikki loosi callu gatanno. Gattinohu memete loosi daanno Wocawaaru aganira goofeenna qajeelaano adha hanaffanno. Waa daankanni gandi loosi konni albaanni hananfeenna loosamanni nooha ikkanna; xaano danchu garinni loosamanni no. Uurrinsha qajeelshunna xiinxallote mereersha ikkanna, qoqqowuha calla ikkikkinnni gobbatenna kalqete deerrinni heewisantannorenna riqibbannore kalaqate jajjabba heewo harisate dandiisiisanno garinni 2016M.D baajeette amande loonsannita Layinki sooreessi qummeessino.
Ledoteno, woloota hasiisanno qajeelshu uduunne wo`munni wo`ma wonshate 400 miliyoone birra gaammoonniha ikkanna; daanno Wocawaaru agani geeshsha wonshate looso loonsanni. Uurrinsha qajeelshunni sa`e rosu minenna ogimmanna tekiniikete loosono hanqaffinote.
Uurrinsha wo`mu dhukisenni looso hanaffanno yannara 13 Ispoortete daninni 1600 Isportenyoota adha dandiitanno. Deerrasi agadhino uduunne wonshiniro qoqqowu gede baalunku Ispoortete daninni heewisamannonna macca Ispoortenyoota kalaqate hattono gobba riqibbanno Ispoortenyoota afidhanno gede illachiinshe loonsanni.
Qoqqowu giddo lekkate kaasenninna Atileetiksete Ispoortenni illachiishshe loossanno pirojektuwa noo daafira, qajeelshunna xiinxallote mereersha ikke baalante Ispoorette daninni illacha tuge loosannota qummeessino.
Jawa uurrinsha ikkasenni Ispoortete addi addi uduunne shiqishatennino owaante uytannota buuxinsoonni.
Abrahaam Saamueel
Bakkalcho Maaja 6, 2015 M.D
