Qidduusi Giyoorgisi Lekkate Kaase Kilawe 16ki doychora boowe kayissinota buuxxino. Qajeelshaanchu Zarihun Shengetihunni qajeeltannori Faradaasinu mitte godo`le gatte heedheennanni tayxeha 2015M.D boowe uminsata assi`ra dandiitino.
Kilawe Itophiyu Lekkate kaase liigete deerrinni xintantu yannanni hanafe 30 yannara boowe gotti assite sunqatenni albisaanote. Tayxehuno ledo Pirimeerete Liigenni 1990M.D haaru garinni tantanante heewisama hanaffu yannanni kayisse 16 heewisamate dirrara qeela dandiitino. Hawaasi Quchuminna Itiyo-Elektiriike lame lame higge qeelatenni Qiduusi Giyoorgisinni hoodisse kullanni kilabba ikkitino. Itophiyu Buninna Deddebiiti qole umiha ikkitino boowe mitte mitte higge kaysatenni dhaggensa giddo borreessiissa dandiitino.
Faradaasinu 2015M.D Itophiyu Pirimeerete Liigera lame hoodissino heewote dirrara boowe gotti assitino. 2014M.D Beetikingete Itophiyu Primeerete Liige heeworano boowe uminsata assidhinoti qaangannite. Barraho Qiduusi Giyoorgisi Addis Ababu Quchuma qeelatenni qoleno hettisamaanchisi Faasiili Kanami kilawe DireDaawu kilawenni qeelamansanni boowe kaysatenni egenantinori Faradaasinu 15kita boowe kayisse sa`ino.
Niri qeellensa ledate roorenkanni hedote giddo worranni gede assinohu tayxe heewote diro umi doychora Priimeerete Liige widira lophinohu Itophiyu Mediine Liige 7:0 ikkino guminni roorrimma adhe qeelasinniiti. Umi doycho fanote godo`lera hendoonni hedo gara ikkitinota leellishshino. Konninni, tayxe Pirimeerete liige heewo mitte godo`le gattanna Baahir Daarete kilawe 6 bixillenni roorte 2015M.D Itophiyu Pirimeerete Liige boowe kayissino.
Qiddus Giyoorgisi Shaampiyoone ikkasi buuxinohu 29ki heewote lamalara Hadiyyu Hosaana 2:0 qeeli gedensaanniit. Faradaasinu shaampiyoona ikkitu yannara 29 godo`lenni 63 bixille gamba assatenniiti. Kunino, niro 30 godo`lenni gamba assino xaphoomu guminni 2 bixxillenni ajeeti. Niri yannara gamba assino gumi 30 godo`lenni 65 bixilleeti. Tayxe kayinni 29 godo`lenni gamba assino gumi 63 bixxille callaho.
Tayxe diro 29 heewonni 53 eo eessa dandiitino. Insara e`ino eo 20 ikkitanno. Nirite ledo heewinsiro eote kiiro luphi yitinote. 2014M.D heewote diro 30 heewonni wole kilawera eessitino eo 50 ikkitanno. Insara 11 ikkitanno eo e`inonsa. Nirita tayxete ledo heewinsiro honse eo roorte e`inonsa. Gargarooshshu kifilera daafuru noota lellishanno.
Pirimeere Liige tayxte diro rosantino heewisamaano kilawe gobbaanni ikkitino haaro kilabba lainohunni baxxinore leellisha dandiino. Itophiyu Mediinenna Baahir Daarete Quchumi jeefote boowe kayisa hooggurono; noonsa jironninna godo`laanonsa isilanchimmanni hettisamaano ikkitinota leellishshino. Itophiyu Mediine umi doycho heewonni hala`lado eo e`eennasi qelamiro nafa, rahotenni umosi qajeelshe bocu heewote diri geeshsha liige massaganni Qiduusi Giyoorgisi hettisamaancho ikke sufinoti dhaggete.
Mediini laynki bocu diri heewote yannara daafuru amadisirono, iso riqibbe Xaanu Dambali Baahir Daare, Qiduusi Giyoorgisi ledo hettisama dandiitino. Baahir Daarete kilawe dhaggensanni umi yannara boowe kaysate dhaggeeffantanni millimmo assa dandiiturono, Faradaasine Itophiyu Pirimeere Liige Boowe kaysatenni hoolinonsahu dino.
Faradaasinu 30ki lamala Pirimeerete Liige godo`le wonshate heewo assitu gedensaanni Shaampiyoone ikkitino boowenna wolootta baraarsha faajjetenni adhitannoha ikkanno. Liige umita ikkite qeeltinohura, Itophiya riqibbe bayriidi ‘’CAF’’ Shaampiyoone Liige beeqqitanno. Tenne battalara beeqqaancho ikke jawa gade afi`rara dandiino.
13 hige ‘’CAF’’ Shaampiyoonira beeqqaancho ikkatenni Itophiyu kilawenni umiha ikkanna; mitte hige 16te giddora eatenni jawa dhagge loosino. Ledoteno, 10 Afiriku kilabba Shaampiyoone, 2- kaafi Konfedereeshiine boowenna sase kaafi qeellete qeelle boowe beeqqatenni albisaancho ikkitinoti Qiduusi Giyoorgisi Kilaweeti.
Abrahaam Saamueel
Bakkalcho Ella 29, 2015 M.D
