Abrahaam Saamueel
2024 Paarisi Olompiikete heewora seennu lekkate kowaase gaamo Afiriku Zoone umi doycho filote heewora Chaadigobba ledo gaammoonniti seennu lekkate Kuwaase gaamo (Luusi), qixxaawonsa balaxxe Addisi Ababaho assitanno. Konnira kaa`lannonsara qaru qajeelshaanchi Firew Hayilegebrieel 34 godo`laanora woshshatto assino.
2024 Olompikete heewora Faransayete qaru quchumi Paarisete qixxeessonni heewo harisate mittu diri callu gatino. Jawu kalqete ispoortete jilira lamunku ko/teenni 40 ali ispoortenyoota karsine harinsanniha ikkanna, haammatu ispoortenyooti beeqqitanno gede assate albisaancho battalaati. Konnira, qixxeessitanno gobba balaxote qixxaawo muleenni gobbuwa battalate beeqqitanno heewosamaano badate filote heewono assitanno. Ikkinohura, addi addi ispoortete akatinni filo assineenna muli yanna giddo heewisiinsanni.
Gobbuwa deerrinsa garinni, filte heewo harissanno ispoorte giddo lekkate Kuwaase mittete. Itophiyuno seennu lekkate Kuwaasenni Olompikete beeqqaano ikkate Afiriku Zoonenni filote heewo assinanni. Afiriku seennu lekkate Kuwaase filote heewo shoole dooycho nooha ikkanna; umi dooycho filote heewo Maaja 3-11 M.D geeshsha harinsanni.
Itophiyu Gobboomu Gaamo Luusi, umi dooycho filote heewo kulloonni yanna giddo Chaadi darawosi ledo heewisamanno. Luusi, kalqete deerrini 125 deerra amadde nooha ikkanna, Chaadi kayinni kalqetenni deerra uynoonninsakki gobuwa giddo nooreeti. Lamente gobbuwa qeelturi laayinki dooychonni filo Naayjeeriyu ledo assitanno.
Qajeelshaanchu Firewu Hayilegebremikalenni massagantannoti Luusi gaamo, balaxote filo heewo woyyaabbino ikkadimmanni sa’’ate kaajjado millimmo assitanno yine agarranni. Afirikiha dancha gede Kuwaase godo`litanno yine agarranni gobboomu gaamo ikkitinori Luusiuu, woyyaabbino qixxaaworanna gumira wedellanna gade afidhino godo`laano karsatenni qixxaawonsa Maakisanyote barrinni kaayisse hanaffino. Godo`laano Sanyote soodo Addisi Ababaho Jupiteri Hoteelera ripoorte assite millimmo hanaffanno gede hajajo uyneenna hanaffino.
Qajeelshanchu Firewu, Luusiuura woshshatto assi woyte seennu Pirimeere Liige Champiyooni giddo Itophiyu Daddalu Baanke agaraanchunni kaayisse godo`laanote geeshsha xaphoomunni sette godo`laano doorsiissino. Mechaalinna Hawaasi quchumi seennu kilawe mittu mittunku onte onte godo`laano doorsiisa dandiitino.
Gobboomu gaamo shoole eote agaraancho karsite amaddinoha ikkanna; Taarikwa Bergena, Firewooyne Gebiru, Beeteliheem Yohaannisitinna Tsiyooni Girmitia woshshatto assinoonni eote agaraanooti. Bizuaayyehu Taaddese, Naardoosi Geetinneti, Beeteliheemi Baqqala, Natsaanneti Tseggaye, Qiddist Zeleqe, Menderiina Kindeyihun, Bizuaayyehu Aberra, Elsaabeeti Taammiru, Demmeqqechi Daanieel, Tigist Hayilenna Dirshaye Menza gaamote giddo karsinoonni godo`laanooti.
Mereerimu baaychi godo`laano hones karsine woshshinoonni. Insano, Nibonyi yeni, Mesay Mekkonniin, Meaadini Saahilu, Tsiyooni Feyyera, Hiywoti Dangiso, Nigist Haaayilu, Raakeebi Alemaayyehunna Nigaati Geetaachewu doorroonni. Eo eessitannorinna gargaraanote kifile hoodinse haammata godo`laano karsinoonniha ikkanna, tonne godo`laano amaddino. Looza Aberra, Aregaashshi Kaalsa, Aryaati Odingi, Redieeti Asiresahanyi, Turisti Lemma, Maarta Wolde, Alemitu Diriiba, Nigisti Baqqale, Bareedu Baqqalanna Seenaafi Waaquma eo eessitanno yine woshshato assinoonni godo`laanooti.
Luusi baalunku xawu kifilera kaajjaddu gadi noonsa beeddahe godo`laano gamba assinoha ikkanna, balaxote heewo iille higate heewonni sa`anno yine hedono uynoonninsa. Itophiyu seennu Pirimeere Liigera onte higge beeddakko ikkite eo eessatenni doorantinotinna gobboomu gaamono jawa illacha tugginoti Looza Aberrite ledo, Aregaashshi Kaasiti, Seenafi Waaqumiti, Aryaati Edonga, Turisti Lemmanna Taaarikwa Bergenna noonsaha kaajjado gade xaadisse Gobboomu Gaamora guma abbate jawa ille tungoonnire ikkansa agarrannireeti.
Bakkalcho Ella 15, 2015 M.D
