Abrahaam Saamueel
Addisi Ababa:- Chaayinaho Laanzhu quchumira harinsoonni labballu maraatoone heewora Itophiyu atleetooti 1-7 geeshsha hoodisse fulatenni qeeltino. Lamalate goofimarchira babbaxxitino kalqete gobbuwara harinsoonni maaratoonete atileetikisete heewonni Itophiyu atiletooti qeelletenni jeeffissino.
Tenne atileetiksete heewo mereero 2023 Laanzhu maaratoone heewo Itophiyu atiletooti baalunku ko/ teenni qeeltino. Baxxinohunni, labballu mereero assinoonni heewora Itophiyu atileetiksooti 1-7 geeshsha hoodisse eatenni qeeltino.
Heewote aana Atileetichu Hayilemariyaam Kiroosihu, umiha ikke qeelinoha ikkanna, Afeworqi Mesfiini, Hayimanoti Allehu, Hayile Lemmi, Abbayine Deggu, Yohaannis Mekashi, Dubari Abdiisihu hoodisse 1- 7 geeshsha noo deerra amadde jeeffissino.
Seennu giddo, Atileeticho Letebirhaane Hayilay umiha fultinoha ikkanna, Atileeticho Taaddelechi Baqqaliti Layinkiha ikkite qeeltino. Biraazilete Riiyo Dejeneeri harinsoonni maratoonete heewora seennu heewo harinsoonniha ikkanna, seennu giddo Atileeticho Zinnaashsi Debbebet umiha ikkite qeeltino.
Neezerilaandete harinsoonni bocu maraatoone heewora Nigist Haftu umiha ikkite heewo guddino. Tenne heewora labballu giddo Atileetichu Haftu Tekiluhunna Ashennaafi Kiroosihu layinkihanna sayikki deerra amdde guddino.
Ameerikaho Niyoorkete harinsoonni 10 kumi meetire heewora Atileeticho Sanbare Tafarriti basete saate woyyeessite qeeltino. Faransayete harinsoonni 5 kumi meetire heewora Atiletocho Mediina Isititino basete saate woyyeessite qeela dandiitino.
Itophiyu Beetikinge Pirimiyeerete Liige Tayxe Boowe Kaayisannohu Ayeti?
Itophiyu Pirimiyeere Liige 2015 M.D heewo duuchu dani jifonni dukkisante heewisantanni afantanno. Xeenu batinyi, godo`linanni xawi woy istaadiyemete qarrinni jifantanni keeshshitinoti Beetikinge Itophiyu Pirimiyeerete Liige muli yanna giddo jeefo afidhanno. Kayinnilla, boowe kaaysannohu xaanni quqquxanni afamanno.
Tenne Pirimiyeere Lliigete heewo xaa yannara umiha ikke massaganni noohu duucha hige Itophiyu Pirimiyeerete Liige boowe kaayissinori Faradaasinu Qidusi Giyorgisi kilaweeti. Laayinkiha ikke hoodise noohu Amaaru Qoqqowi Bahir Daarete Xaanu Mogode /Xaanu Dambala/ yinanni kilaweeti.
Beetikinge Itophiyu Pirimiyeere Liige Qidduusi Giyorgisi 59 bixxillenni umiha ikke massaganna, Baahir Daarete Kanami 54 bixxille abbatenni laayinki deerra amade heewo kaajjishe sufanni afamanno. Itophiyu Mediine Kilawe 48 bixxillenni sayikki deerra amadde nooha ikkanna; Hawaasi quchumi Kilawe kayinni 41 bixxillenni shoolki deerra amadde no.
Sidaamu Buni kilawe 35 bixxillenni 12ki deerra amadde nooha ikkanna, konni gedenoonni noo heewo qeela hoogiro dirrate rakko giddora eannno yine waajjinanni. Korkaatuno dirrate qixxaabbe noo kilabbanni lame bixxillenni calla roore noo daafiraati.
Lagaxaafo Lagadaadinna Itophiyu Mebraat Hayile kilawe liigete giddonni dirransa balaxxe buuxxino kilawe ikkitanna, Arbaamincenna Wolqixxe taalo bixxillenni dirrate mereero no. Tini kilabba dirratenni gatate suffe kaajjdo heewo assitanno yine agarranni. Lamunku giddo mittu liigetenni dirransa muli yanna heewo gedensaanni buunxanniha ikkanno.
Tayxe 2015 M.D Itophiyu Pirimiyeerete Liige heewo qeele boowe kaaysate Qiddusi Giyorgisinna Baahir Daare gamba yite nooha ikkanna, hiitti kilawe boowe kaaysannoro dagganno heewo gedenoonni xawe leellanno.
Bakkalcho Ella 8, 2015 M.D
