Abbebech Maatewoos
Mitte yannara mittichu manchi ilino ooso lamu baxxite mini giddo gibbo hanaffanno. Giwantanni qarrissuhu gedensaanni annu lowota dadille, “mitto coye leellisheemmona” yee togo assi.
Lamenka giwantannore woshshe, tonne shaaladda haqqe abbitanno gede asseenna insano abbitu. Abbituhu gedensaanni tonnenka mitteenni usure annu annunku aante aantetenni angansanni hiiqqitanno assi. Annu annunku wo`naaltutano hiiqqama giwi.
Hakkonni gedensaanni usurino haqqe tire, mitto mitto hiiqqitanno asse uyita, butu butu assite hiiqqaqqiteenna togo yiinsa; “Ooso`ya mittimmatenni heedhinanniha ikkeemmero tonnunku haqqichi gede kaajjadda ikkitinanni. Aye baarigaarino gawajja didandaanno`ne.
Kayinni mitte mundeeri ki`ne ki`newa giwantinanni heedhinanniha ikkiro shotu garinni gawajjantinanni’’ yeenna, oososino anninsa amaale leelteennansa hindiiddo uurrisi`ra hoogge wi`litanni araarante albillicho mittimmansa kaajjishshe halamatenni dancha base iillitino yinanni.
Bakkalcho Ella 1, 2015 M.D
