Addisu Adoola
Addis Ababa: Ella 30/2013 M.D (Faana Biroodicastingi Korpooreeshiini) dagate huuro aliidimma ayirrissanno gede Wodiidi Qoqqowi hettisamaano paartubba egensiissu.
Doorshu keeraanchimmara daga baqqiimanna hala’lado beeqqo naandannita ikkitinotano paartubba fushshitino 12 bixxille uurrinshate xawishsha faajje assitino.
Wodiidi Qoqqowira ha’rino xaphoomu doorshira Jireenyano lendeenna 21 paartubba dooramaano shiqishidhe doorshaho beeqqitino.
Gutu amaale mine uurrinse doorshu harinsho giddo xaaddanno qarrubba tirate mittimmatenni loossanni keeshshitinori kuri hettisamaano paartubba techo barra Hawaasa hasaawa assitino.
Paartubba hasaawu gumulora dagate huuro aliidimma ayirrinseemmo yite coydhino. Qoqqowu giddo doorshu ha’rino 88 doorshu qoqqowira hettisantiro kuri 21 paartubba fushshitino 12 bixxille uurrinshate xawishshinni, xaphooma doorshu ha’rinsho keeraancho ikkitino gede xawisatenni konnirano la’annonsa bissa galatantara hasiissanno gede kayissino.
Baxxeewo garinni dooraano dagara lowo ayirrinyenna galata shiqinsheemmono yino. Demokiraasichu amanyooti doorshunniha ikkikkinni hee’rate hajooti yitinori paartubba doorshu harinshonni qeelanna qeelama ayi woyteno heedhannota ikkitinohura dagate huuro aliidimmanni ammanneemmo yaatennino coydhino. Baalanti paartubba, miillanna irkisaano guma sumuu yite adhitanno gedeno woxaratto shiqishansa Wodiidi Qoqqowi Mangittete Xaadooshshi Hajubba Biironni afi’noommo mashalaqqe xawissanno.
Adawunna farcote bissara, tuqu xaadooshshubbara, qoqqowu mangittenna amaale minira, doorshu boorderanna woloottano la’annonsa bissara galata shiqishshino.
Aanteteno mangitte gobboomu sumiimmeranna horora loossanno gede xa’mitinoha ikkanna hettisamaano paartubbano politiku beeqqonni sa’e latishshu loossarano baqqinaatunni beeqqitanno gede xa’mitino.
Bakkalcho Maaja 1/2013 M.D
