Abrahaam Saamueel
Itophiyaho Faradu ispoorte assooseeshiine daanno diro Aljeeriyaho qixxeessineenna harinsanni Afiriku Faradu Ispoorte Shaampiyoonira gobboomu gaamo riqibbanno ispoortenyooti doorantino. Gobboomu gaamo sase qixxaawote fooliishsho noonsata xawissino.
Shaampiyoone qixxaabbannohu Afiriku Faradu ispoorte konfidireeshine (ACES) widoonni ikkanna, sasu diririmi deerrinni beenkeenna harinsanni. Diru deerri qaaqquullu gaamo, 12-14 geeshsha, wedellu gaaamo 15-18 geeshshanna jajjabbu deerrinni 18 ali diri noonsa ispoortenyoota amadinoho. Heewono daanno diro 2016 M.D Birra aganira harinsanni.
Tenne heewora Itophiyu Faradu Assooseeshiine gobbansa riqibbanno gobboomu gaamo miilla doorsha hattono qixxaawote harinsho Ammajje 2015 M.D kaayise babbaxxitino fooliishshonni bebbeenke loonsanni hee`noonnita egensiissino. Ispoortenyootu doorantinohu addi addi filote heeworaati.
Umi gafi qixxaawora dirinsa deerrinni heewisantanno ispoortanyootu doorsha harinsoonniha ikkanna; ispoortanyootu settu assooseeshiinete miilla kilawenni doorama dandiitino. Konni gafinni qaaqquullu gaamonni 11, wedellu gaaamonni 9, ispoortanyooti doorantino. Layinkiti qixxawote kifile filote heewo harisa ikkanna, heewo harisate dandiisiisanno wodho qixxaabbe kilawete ledo sumimmete aana iillini gedensaanni assooseeshiinete heewo qixxeessitanno komite kilawe beeheenna harisa dandiino.
Wodhote garinni sase filote heewo harinsiro, umiti filote heewo Dotteessa 22/2015 M.D, layinkiti, Onkoleessa 5/2015 M.D Beeku Fardi Faradu ispoortete kilawera harinsoonni. Sayikkihu jeefote filote heewo Onkoleessa 19/2015 M.D Beeku Fardi ispoortete kilawera harinse gobboomu gaamo dirinsa deerrinni riqibbanno ispoortanyooti doorantino.
Konni kaiminni, sase filote heewo jeeffu gedensaanni gaamo gaamontenni jeefote heewo xaphoomu guminni 1-4 geeshsha fultinore, qoleno mitto agaraancho heewisamaancho doorroonni. Meyaa ispoortanya jawaachishate yine gaamo gaamotenni mitte mitte meyaa ispoortanyooti dooramate kaayyo uynara dandiinanni.
Gobboomu gaamo riqibbe jajjabbu gaamonni Amjedi Saami 30 bixxillinni umiha, Daanieeli Salamooni 24 bixxillinni laynkiha, Abiy Berihun 23 bixxillinni sayikkiha, Tegenu Araarso 22 bixxillinni shoolkiha ikkite doorantino. Agaaraancho ikke Yohaannisi Taaddessehu 16 bixxillinni gaamote giddo karsamara dandiino.
Wedellu gaamonni, Mehamedi Saami, Abrahaaam Kaasu, Yoonaasi Geetunna Amaare Usumaani 1-4 geeshsha fulatenni doorantanna, Maayikki Yohaannisi agaraancho ikke karsamino. Qaaqquullu gaamonni baalunku Beeki Fardi ispoortete kilawenni doorantanna, roduuwu Fexxenne Teshoomehunna Qeneniisi Tehsoomehu, Addisi Nugusu, Jittu Girmanna Fexxenne Nugusuhu xaaddotenni doorantanna, Shiimiya Deesamo agaraancho ikke dooramino.
Kalaa Tseggahuni Tessemmihu Beeku Fardi ispoortete kilawe anni jeefote filo heewora deerru deerrunkunni haammata heewisamaano amade shiqinota xawise, baxxinohunni, qaaqquullu gaamonni lee qaaqquulle riqibbinota qummeessino. Sai diro kilawetenni doorantino leewu lophitanni noori Itophiya riqibbe Aljeeriyaho assinoonni heewora mittuo culqi borreessaminota qaagiisse, tayxeno dancha uurrinsha aana noohura danchu gumi borreessamannota agarranni. Ispoorte wole ispoortenni badannori faradu ispportera lamu qajeelshi agadhanno.
Gobboomu gaamo sasente gaamonni qixxaawo assite jeefishshe heewo beeqqitannoha ikkanno. Doorantino ispoortenyoota haare lamu gafinni beenke qixxaawo assinannita qummeessinoonni. Umi qajeelshu gaamo Ella 1-30 2015 M. D geeshsha keeshshannoha ikkanna, laayinki gafi qole Wocawaaro 1-birra 15/2016 M.D geeshsha harinsanniha ikkanno.
Bakkalcho Onkoleessa 24, 2015 M.D
