Abrahaam Saamueel
Addisi Ababa:-Sa’u honse aganna giddo maatete jireenyi qixxaawonni loonsoonni loosinni gobbate deerrinni jawaatu gumi leellinota Giwirinnu Ministere egensiissino. Ministeerete Dagate Xaadooshshi Gumulsiisaanchi Kalaa Kebbede Laaqewuhu Itophiyu Pireesete Uurrinshara xawisanni; gobbate gede maatete jireenyi giwirunnu millimmonni jawaatu gumi borreessamanni no.
Kalaa Kebbede xawishshi garinni, 2015 laalchu diro honsu aganinni 352.7 kume toone maala qixxeessate mixo amande, 334.2 kume toone qixxeessinoonni. Gumulshuno 94.8 % xibbunni ikkino. Maalu laalchi ledo qulxu`mete jiro latishsha lossate loonsoonni loosi noota kule, Itophiyaho heedhannoti jajjabba garbuwa, baxxino illachira hossanno kofattonna shiimammadda waayi bissa horonsi`rate wedellu qulxu`mete laalchi aana beeqqaano ikkitanno gede assinanni hee`noonnita qummeessino.
Qulxu`mete laalchinni 80. 8 kume toone laalcho laashshate mixi`ne, 76.5 kume toone laalcho honsu agani giddo laashshinoonni. Gumulshuno mixotenni 95% anga xibbunni ikkino. Lukkuwu maalanna quuphu laalchimma lossate kaa`lannoha maatete jireenyi looso loonsoonnita Kalaa Kebbede coy`rino.
Honsu agani giddo 81.6 kumi kuntaala toone lukkuwu maala laashshate mixi`ne, 88.8 kumi toone gumulloonni. Ledoteno, honsu agani giddo 3.24 biliyoone quuphe laashshate loosono loonsoonni. Lukkuwunna quuphu laalchi ledo amadaminohunni kalaqantinota sagalete shiqisho anjenna waagu lexxo gargarate kaa`lannoha sagalete qixxeesso qajeelsha Ministere shiqishshannota qummeessino.
Adote laalchono honsu agani giddo, 5.44 biliyoone liitire laashshate dandiinoonnita egensiisino. Adote laalcho hallanyootahonna ado xalalshitanno ijaarrara shiqinshoonnita xawise, handaarunni shiqanno laalcho lossate wo`naalsha assinanni hee`noonnita coy`rino. Maatete jireenyi loossanni honsu agani giddo 82.8 kumi toone malawu laalcho, 6.18 kumi toone gagate laalchonna 39.1 kumi toone haarete laalcho afi`noonnita Kalaa Aberri huwachishino.
Bakkalcho Onkoleessa 24, 2015 M.D
