Ingilizete qansichi Antooni Bergesi 42 dirisinni umu giddi kaansere korkaatinni lubbotenni keeshshannohu mittu dirira calla ikkinota xagisaano kultannosi. Tenne yannara lowo geeshsha dadillanno; ikkirono ani rewummo gedensaanni minaama’ya qarrantannokki gede yaatenni gattinoe yanna giddo looso loosa noo’’e; minaama’yara iqqa wora nooe yee mudhi.
Antooni Bergersi qarooyye borreessaancho di ikkino. Ikkollana giddosi duwantino dandoo noosita afinohura borro borreessa hanafi. Dhaaggeefachishanno garinni gatinosi mittu diri giddo 5 maxaaffa borreesse gudi. Kunino egennaamu borreessaanchi ‘Em Fosteri’ heeshshosi diri wo’munkunni borreessinohu aleenni isi mittu dirinni borreessinohu roorannonkanni. Hattono ‘JD. Stelenger’ yaamamino borreessaanchi heeshshosi dirinni borreessino maxaaffa aleenni erotenni borreessi.
Kaanserete dhibbinni reyate mittu diri gatinohe yinoonnihu Antooni bergesi mittonka diro Lendenete Hospitaale giddo saysino. Ikkollana batinye Serebraalete buuxo gedensaanni hiittoo dhibbino ikko muje diafantinosi. Tenne yannaraati wo’ma yanna borreessaancho ikkate mudhinohu.
Tenne uulla aana hee’rino yanna giddo 76 dirisinni tenne kalqenni rewotenni baxxi yanna geeshsha 70 maxaaffa nabbawaanote shiqishino. Baxxinohunni ‘Clock Work Oranges’ yaamamino maxaafisi afamishsha afi’rino loososiiti.
Antooni Bergesi ‘reyate mittu dirilla noohe yaa hoongoommeronna minaamasi qarrantannokki gede ragge worese reemmo’ yitanno hedonni ka’’a hoogoommero kageeshshi kiiro noose maxaaffa diboreessinonkanni. Ninkeno:- Noonkehu techo calla ikkinota anfe giddonke duwantino dandoo fushshine wolootaho xawaabbu caabbicho xawinso.
Bakkalcho Onkoleessa 3, 2015 M.D
