Qiddist Gezaheny
Faranjootu barru kiironni Dotteessa 23 kalqoomu maxaaffate barraati. Ninkeno konne barra korkaata assatenni kalqete albisa qalote borro boreessaancho ikkitinota Daniella Istilita haranchunni kullammo’nera banxoommo.
Ilantinohu faranjootu barru kiironni Woxawaajje 14, 1947 nni Ameerikaho New Yorki quchumiraati. Xaa yannara dirise 74 iillino yaate. “Going Home” yinannita umi qalote borrose borreessitinnohu faranjootu 1972 ikkanna; tenne borrosenni afidhino adhamooshshinni kakka’’atenni wo’ma yanna borreessaancho ikkitino.
Techo barri geeshsha 180 ikkitannota qalote borro, kiirotenna oosote maxaaffa attamisiissino. Kuri mereerinni 140 ikkitannori seeda qalote borrooti. Ise borro Amaaru afoo lendanna 43 afuubbanni tirantino. 22 ikkitanno maxaaffase kayinni Filmete widira soorrantino. Daniella Istili Ingilizete afiinni borreessitinno maxaaffanna babbaxxitino afuubbara soorrinoonnita ise borro xaphoomunni 800 Miliyoonenni batinse hirroonni.
Daniella kalqete aana maxaaffansa lowo geeshsha btinseenna hirantinonsa 10 borreessaano mereerinni shoolki deerrira afantanno. Xaa yannara lubbote noo borreessaano mereerinni kayinni balaxaanchote. Isenni roortannori sasu lubbote dino; insano su’minsanni Shekispier, Agata Kiristinna Barbara Kartiland yaamantanno. Hattono wo’munku woyti qara hiramaancho Ameeriku borreessaanchooti. Isenni balaxxannori Shekispiiriuu Ingilete qansootaati.
Daiella nabbawaanonniwa hala’lado adhamooshshe afidhinohu borrose jawunni shiimu geeshsha; soqqamaanchunni loosu harisaanchi geeshsha ; hirtanno loosaasinenni kayisse qara massagaano geeshsha mittu mittunku manchi holge kissannore ikkansanniiti. Batinye borrose amado “Baxillenna heeshsho” ikkirono baalunku heeshsho kikkissanno hajubba kayissanno.
Daniella borreessaanchimmasenni lowo geeshsha gummaa’mitinno. Mine amadate heeshshose kayinni qarrunni wo’mitinnote. Umi galtese ledo adhantinohu 18 dirisenni 1965 A.K nni ikkanna hatte yannanni kayisse 2002 geeshsha onte higge mine assidhe tirtino. Tenne yanna giddo Honse ooso iltino. Sa’u 20 dirra giddo kayinni mine assi’ra ikkitoena yite San fransisko quchumira afamanno hee’nanni minese heedhanni borrose suffino.
Bue:- Book Store FB qoolinni
Bakkalcho Onkoleessa 3, 2015 M.D
