Addisu Adoola
Mitte yannara mittu manchi waa fulara waay laga maranno. Hatte yannarano waa widira fulara hasi’re fula hooge waay gama noo hamashshi ledo xaadanno. Hamashshu kunino mancho “mancho konne waa widira fula hasi’re fula hoogoommona fushshie ballo” yaanno. Manchuno “maahoyye; umi’yara xaaxamixa fushsheemmohena” yaannosi. Hamashshuno manchu umira xaaxameenna Manchu haa’re waa widira fushshannosi.
Waa widoonni fushshisi gedensaanni kayinni hamashshu mancho “qasummohekkinni umikki aaninni didirreemmo” yaannosi. Manchu hamashsho huucci’ra hanafanno. Hamashshu giwanno. Konni gedensaanni Manchu hamashsho “maahoyyena tennera yoo yaannonkehuwa ha’noxa” yaannosi.
Hamashshuno tenne hedonni sumuu yeenna yoo afi’rate Qamalchonniwa martanno. Qamalchoteno Manchu kalaqaminore odeessannose; Qamalchono hamashsho “kuni noorichooti” yite xa’mitanno. Hamashshuno qole “ee nooreeti” yaannose.
Qamalchono tenne odoo macciishshite guddu gedensaanni “ani tenne yoo yeemmahu haqqichote aana hee’reeti” yitanno. Insano sumuu yiteenna Qamalcho haqqicho giddite ka’uti hamashsho “hanni ikkite giddito gara leellishie” yitanno. Hamashshuno halaale assi’re Manchu uminni shalalli yee dirranno.
Hatte yannarano qamalcho mancho “angakki noohu maati” yite xa’mitanno. Manchuno qolannoti “dullaho” yaanno. Qamalchono mancho qoltannoti “maa agaroottoyya?” Manchu amadino dullinni hamashsho umo gane shiino yinanni.
Hamashsho shiinosihu maa lawanno’ne? Manchu yitiniro dee’ni. Hamashsho bunshesi shitinosi. Qarru qalxisi yannara saysinosiha mancho qasummohekkinni didirreemmo yaasi. Konni daafira rodiikkira busha assitooti. Halchitootisino.
Bakkalcho Dotteessa 19, 2015 M.D Hamuse
