Duuchare bayidhinoti
Bayidhe baraadhinoti
Hagiirre haadhannoti
Bu’la budu bayi’ra bulduudda Ficheenke
Hundi dagginoti bayi’ra jiro noonke.
Qaange hoqqinanniti
Honge wodhinanniti
Shanfe codhinanniti
Sirinya ku’linanniti.
Geerru masaaleenna
Masaale faleenna
Fale kakkaleenna
Fule lallaweenna
Fichee dagginona yeenna
Cimeessu anga tidhe
Laloho boole hidhe
Giwaminoha araarse
Seemmasi diriirse
Baxille roorse
Hulluuqa qanseenna giddoonni sa’nanniti
Mitteenni amadamme baxillunni ha’nanniti
Akkalinoha giirre haarore la’nanniti
Hagiirrunni halamme, hexxotenni ka’nanniti
Ayirrinyu donanke, Fichee adawadhinanniti.
Alba culu yaanno buuru finiinchi booso
Eleella daggu yinanna goxxukkinni ooso
Guggudonna xilte injoo xalashshine
Hisattino mixashshora omalla fonoo halashshine,
Shaafeeta shiqinsheenna
Guggudunni shiqqeenna,
Jawu maassi’reenna
Fichee jeeji yeenna
Ado huuwe eenna
Atootu gatannoti godowu duuweenna
Mini anni guto kae alba fa’ne
Taalchu finiinchira gammuuta waa ga’ne
Umo asse boole itisi’re lalo
Boole itino lalo fane qole kalo
Qaaqquullu qachaho duuwe burraaqanna
Seennu gudumaaleho horete daaqanna
Labballu dirame maammaashsha laaqanna
Faaro irbanno woyte jaala doore jaalu
Hirbunni shooshshanna annuwunnihu qeexaalu
Ali eeli xaade suunsanno woyte baalu
Ficheenke suusaati tenqe gudumaalu
Mittimma kaajjishshannoti
Xircho waajjishshannoti
Nafara tansa’eenna
Baara widoo sa’eenna
Kalqe baala la’eenna
La’e halchitanni
Daaete lolakkannoti
Cambalaalla yitanno.
Hagiidhannoti haqquno
Jawunna qaaqquno
Meyaatinna danquno
Baalunkura jiro
Qaanfanniti haaro diro
Bulduudda Ficheenke
Bayi’ra jiro noonke.
Bue: Alemu La’miso
Bakkalcho Dotteessa 12, 2015 M.D
