Fichee Cambalaallate ayyaana ayirrisate hala’lado qixxaawo assinanni. Qixxaawo dagoomittete deerrinninna maatete deerrinni qixxaambanni. Dagoomittete deerrinni assinanni ayyaanu qixxaawo daga mitte assitanno qixxaawooti.
Kuri giddonni gama la’nummoro; Ficheete ayyaani meddi yaanno woyte cimeeyye usura e’anno. Tenne yannara geerru barri yannara sagale di-ittanno, xeertidhe dihadhanno, yannansa huuccattotenna giwaminoha araarsatenni sayissanno.
Wolu dagoomittetenni ayyaanaho assinanni qixxaawo, haaru diri ayyaani hosanno barra lallawate. Konneno ayyaanto barra la’e ayyaanu hosanno barra afunna taashshidhu gedensaanni, garote iillisheenna lallambanni. Lallawa ayyaanaho honsu barri gate hee’reena qawaadu dikkora gerecho qanse lallambanni.
Lallawa lallawannohu gosate garo ikkanna togo yee lallawano:
«Tayixe Fichee techo honse qawaado ayirrinsanni».
«Baalunku xaanni Kayise qixxaawo assona».
«Macciishinokki baalira qixxaawe ayyaana ayirrsanno gede kulle».
“Ficheete ayyaana ayirrinsanni yannara gibbo giwansho heedhoonke”.
«Giwaminohu araaramo».
«Caacco noohehu guxxi».
«Xano noohe manchino tidhi».
«Qege noohehuno fiicciri».
«Maalu mine galoonke».
«Xidduu noottohu sammote buuro qassiri».
«Haqqa murroonke».
«Saada gannoonke».
«Koffeeynu hee’roonke».
«Haaru diri keeru keeratunniha ikko».
Wole dagoomu deerrinni assinanni qixxaawo, gudumaale qixxeessa, ayyaana keeruninna hagiirrunni ayirrinsanni gara geerru malanna hasaawa w k l. Fichee Cambalaallate ayyaana ayirrisate maatete deerrininno haammata qixxaawo assinanni. Tenne qixxaawo maatete giddo annu, amatenna oosote qixxaawo yine gaama dandiinanni.
Annu minu heelliicho ikkasi deerrinni, haaru dirira maatesi hagiirsiisate lowo qixxaawo assanno. Minu akkallinoha ikkiro mine gatamare, qae huxxe biifissanno. Oososira, minaamaranna umisirano haaru dirira haaro uddano hirano. Ficheete ayyaani barra haqqe murrannikkihura, ayyaanaho ikkitanno giirate haqqe balaxe qineesanno. Qeexaala adhe fullanno wonqo, worjenna bise qixxeessi’ranno. Ayyaanu barra lalu haaro kalo ittanno daafira, hayiso kalse booleno qixxeesa agadhano.
Minaamano umise widoonni hala’lado qixxaawo assittanno. Galtete widoonni assitanno qixxaawo jilahonna koyishshaho shiqqanno sagale qinaawa ikkitanno. Weese yannatenni hogge haaru dirira hoqado waasa qixxeessidhano. Fichee Cambalaallate Ayyaanira hala’ldo koyishsha assinannihura waasa garunni qixxaabbanno. Ayyaanaho intanni sagale buurunna ado baxxitannokkihura lowo buuronna ado qixxeessidhano.
Ooso maatensa giddo assinanni qixxaawora assitanno kaa’lo heedheenna uminsa widoonnino haaru diru soorrora qixxaawo assittanno. Wedellaho haaru diri gaara baxillaancho doodhate kaayyo ledo haa’re daanno daafira wedellu lowo qixxaawonna halchonni agadhanno.
Wedellunna oosote qixxaawo roore anga biinfetenna seesate raga adhittanno. Seenu umo goodayyo amaxxe, heqotenni gophanno. Angate hanshuluule buudhe cuuenna wolootta seesu uduunne wodhano. Kurinna wole haaru diru ayyaani qixxaawo dagoomittetenna maatete deerrinni assinanni hee`neena ayyaanu barri daye iillanno.
Bakkalcho Dotteessa 12, 2015 M.D
