Addis Ababa: Mootimmate widoonni assinoonni Tigrayete qoqqowira ola uurrisate sumiimme daga heddanno yanna afidhanno gede assannoha ikkinota Tigirayete Dimokiraasaawe Paarte Murrichinna Haaroo’mate kofatto Amaale Mini Borro Mini Qaru Dayrekiterichi Dr Aregaaw Berihehu coyi’ri.
Dr Aregaaw Itophiyu Pireese Uurrinsha ledo assino hasaawinni yino garinni; mootimma la’inore la’e assa noose gedeno ammante ikkinohura addinni ola uurrisate lallawa lallabbinohu mittuno abbanno qarri no yee dihedeemmo. Coy gedella kuni lallawi dagate hedate yanna ikkanno.
Dr Aregaawi Berihe xawishshi garinni; daga ammantannonna lowo kakkalo baattinose Juuntu gaamo konni garinni gawajjitannisi noohano ikkirono mite mite qarrubba kayinni leeltanni no; ikkinohurano daga horonna gawajjo baddanno gede boode heddanno yanna afidhanno gede assa dancha ikkitinota xawisanno.
Halaalenka daga tenne yanna horonsidhe heddenna hiincite umise widira higge elannonna gawajjannore bada dandiituro horaameeyye ikkitanno yanna labbannoe yino.
Albano ikkiro daga rosanna soorrama heedhoommesero xa di-ikkino yaannohu Dr Aregaawi; Juuntu konni lamu dirinni hanafe umi’ya mootimma safi’reemmo, baxxeemmo, doorshano harisi’reemmo yaanni dagatenni haariimanni di-ikkanno; muro ninketa ikkinnina ki’neta di-ikkitino yite uurrisa noosenka; hakkoye assa dandiitukkinni gatasenni gobbatenna dagate gede jawa waaga baanti; kunino ikkiro kay daga higanna soorrama dandiituro keeshshinoheha di-ikkinona konni gedensaannino noo akata la’’a hasiissannota coy’rino.
Xaa geeshsha dubboho ofolte halamaanonsa ragaanni Tigrayete qoqqowirano ikko qoqqowu gobbaanni noo gobbanke bissara babbaxxitino shittimmate loossa loossanni keeshshitino; konneno calla di-ikkino xa qolte Meqele quchuma e’nummo yaatenni dagate aana hembeelle, jajja mulqa, di-irkisinoonnie yaanno mannoota shaanni no; konneno uurrisa noositi daga ikkitinota xawisino.
Boode hedate yanna gedensaanni mootimma umose kaajjishshe qoqqowo geissanno yee hedeemmo yinohu Dr Aregaawi; techo geeshshano ikkiro daga baala Juuntu irkisaancho di-ikkitinona dandaami deerrinni halantino cigilenni umose gawajjotenni, mulqamatenni agadha gadacha ikkitannoseno yino.
Tini Juuntu qaafo mittu danino horo noosekkita huwata nooseti dagate yaannohu Dr Aregaawi; korkaatuno tini wolqa dagate marartannoha ikkoommero balaxxenni qarrubbansa hasaawunni tirro dagano konni deerrinni gawajjinonke yini woyte maahoyye yitannonka kay insa daganke yitannota agara ikkikkinni mixonsa biilloonyu aana hegerera hee’ra ikkinohura hasiissannokki kipho giddora mootimma eessite daga qarraho gobbano jawu kisaarira assitino kuni qole mayinnino aleenni gawajjinohu Tigirayete daga ikkinohura insa qasantannohu uminsa horora ikkinota huwatatenni dandaami deerrinni umose agadhanna ikko’ne yaa dandaa noose gede xawisino.
Mootimma qoqqowo e’inohu kuri seera sa’ino manna qorqorshu hunda assatenna seera ayirrisiisateeti; hakkuno deerrunni qinaawino yaate dandiinanni; kayinni insano huna woy dagate aana iillishshanno tiiu xiiwo qorqora dandiinikkinni gatino kuni qole ikkinohu yannate geeshshi gashshooti yanna agadhitino kaajjado qaafo adha dandaa hoogasinniiti. Ikkinohurano kuri qarrubba rakke gatteennanna mootimmano hanaffino seera ayirrisiisate gaado qeelletenni gumulte hunaasineno seeraho shiqishate widoonni xaano kaajjino loosi hasiisanno; konneno woyyino rosichinna egennonni loossanno yitanno ama’no nooe yino.
“Mootimma konni gedensaannino ikkiro qoqqowo higa gattannokkihura balanxe loosa hasiissanno coy dagate wodana macciishsha, Juuntu cu’mamannokki akata seekkite xiinxalla hasiissanno konne assa dandiiniro qole baalu Juuntu irkisaano ikkinokkihura rahotenni soorro la’e Juunta higannokkita dagate aaninni dirrisanna wirro qarru giddora e’annokki assa dandiinanni” yino.
Addisu Adoola
Bakkalcho Ella 24 / 2013 M.D
