Addis Ababa:- Itophiyu aana mite mite gobbuwa assitannohu annga worate loosi doorshunni dagate adhamooshshi noo mootimma uurrituha ikkiro ga’a lophite umise horo agarsiissannota, jawaatanna addi xiiwo assate dhuku noose gobba ikkitanno yite waajjatenni ikkinota Hawaasi Yuniverste Rosiisaanchinna xiinxalaanchu Dr Gebrekirstoosi Nuuriyehu xawisino.
Dr Gebrekirstoosi Nuuriyehu Itophiyu Pireesete Uurrinshira xawisino garinni; mite mite gobbuwa assitannoti hira eate loosi doorshunni dagate adhamooshshi noose gobba uurrituha ikkiro umise horo agarsiissannota, jawaatanna xiiwo kalaqa dandiitanno gobba ikkitanno yite waajjiteeti.
Gobbaydi gobbuwa hira e’annohu dagate qoosso qarrisseennansa ikkikkini, uminsa horo agarsiissara hasidhe ikkinota afa hasiissanno. Afidhanno horo gatturo hira eate wo’naalsha assitanno yino.
Konnira mitte doogoono ikko wole doogoonni xiiwo kalaqqe insa hasatto qineessidhara assitanno wo’naalshi xawe leellanno; hasattonsa qineessate mannimmate qoosso korkaata assite angansa eessite hasattonsa wonshi’rate wo’naalsha assitannota xawisino.
Hasidhu gede ooffannonna doyissitanno mootimma kalaqantara hasidhanno; konnira dagatenni doorantino mootimma dagannita horo agarsiissanno daafira ninke hasatto gufissanno yitanno waajja noonsahura ikkinota qummi assino.
Dr Gebrekirstoosi xawishshi garinni; hira eate assitanni noo loosi daganniti mannimmate qoosso qarriseennansa di-ikkino. Mannimmate qooso sa”a uminsa loossino barshenna hilo Sooriyaho, Yemenete, Liibiyahonna wolootta goobbuwa aana assitinnori konni gurchu loosinsara xawishshaho. Coy gede ikkollana, mannimmate qoosso guggu’line gobba buxisatenna dhuka afidhinokkita assate assinanni gaadooti.
Muli barra Ameerikunna mite mite gobba Itophiyu harisanni noo seeru aliidimma ayirrisate loosi gaadi aana mannu qoosso kisantu yite raaransa baincho loosonsa xawo fushshinoho. Ameeriku Haaroo’mate Kofatto ledo noo coy Gibitse hagiirsiisate noose hasatto qeechaatinna umise horora ikkinota egensiisino.
Itophiyu;- Chaanu, Ruusiyunna wolootta gobbuwa ledo noosehu danchu xaadooshshi insa hagiirsiissannoha ikkinokki daafira uminsa horo ledo amadde hira eate hiixattanni leeltanno yiino.
Gobbaaydi gobbuwa anga eesitannota galchate mootimmate widoonni loonsanni hee`noonni looso irksa hasiissanno; gaance heedhuro hasaawatenni qarra tira dandiinanni. Tini gobbuwa xa loossanni noori Itophiya woffi assate insa hasidhu gede soqqitanno gobba ikkitara hasattonsaatina dagate mittimma kaajjishatenni loosa hasiissannota Dr GebreKirstoosi Nuuriyehu egensiisino.
Bakkalcho Ella 24 / 2013 M.D
Abrahaam Saamueel
