Afriiku mittimma Chayinunna halantino Arabete emreetuwa Itophiyu mangistenni lallamboonniha seera agarsiisate assinanni hee`noonni ola uurrisate lallawi irkinsanni gumulo ikkasi egensiissino.
IFDR mangiste ella 21/2013 m.d mannoomittete kaa`lora yite gumultinota ola uurrisate lallawa hagiirrunni adhitannota Afriiku mittimma egensiissino.
Tigraayete giddo noo qarrira dancha furcho kalaqate Itophiyu mangisite seera agarsiisate assinanni hee`noonni ola uurrisate lallawa fushshasi gara qaafo ikkasinni irkinseemmo yeeti Afriiku mittimma komishiine murrichi Musa Faaqi Mahammatihu fushshino sokkara egensiisinohu.
Halantino Arabete emreetuwa gobbayidi hajonna kalqoomu hale loosu mini fushshino xawishshira, Tigraayete ola uurrisate Itophiyu mangiste ragaanni lallawamasi irkinsanni hedo ikkitinota egensiisino.
Halantino Arabete emreetuwa Itophiyu Tigraayete qoqqowira ola uurrisate sumuume hagiirunni adhitinota xawisse, gumulo qarru giddonni fulate furcho heedhanno gede assannoha ikkasino egensiissino.
Itophiyu assitinota ola uurrisate lallawa irkissannota Chayinu gobbayidi hajo minisitere loosu minisenna kunni loosi mine Afriiku hajubba dayirekitere jeneraalese widoonni egensiissino.
Itophiyunniri giddoyidi qarrubbansa uminsa wolqanni tirate hayyo noonsata ammaneemma yitinoti Chayinu, Tigraayete dagano wole Itophiyu daga gede keerenna jireenya coomishidhanno yine ammaneemmo yitino.
Konni garinni Addis Ababaho afamannohu Ingliizete Enbaaseno ola uurrisate lallawa irkisannota egensiisino. Embaase tuqu xaadooshshi qoolisira fushshino sokkara, Itophiyu mangisite mannoomittete kaa`lora yite gumultino ola uurrisate lallawa hagiirrunni la`annota egensiisino.
Abebech Maatewoos
Bakkalcho Ella 24 / 2013 M.D
