Addis Ababa:-kovid-19te horronni reyatenna amadamate bikki ajasi korkaatinni calla dagoomu de’’ama noosikkita fayyimmate ministere egensiissu.
Fayyimmate ministere komunikeeshiinete dayirekterchi dokter Tegene Raggaasihu baxxinohunni Itophiyu pireesete uurrinshara xawisino garinni; vayiresete finco korkaatinni ministerete loosu mine dagganno reyatenna amadamate bikki mashalaqqe ajjanni daasenni calla dagoomu de’’ama dinosi yino.
Vayirese anga aaninni wirro higge fincantannota ikkasenni kovid-19 te pirotokoole gumulanna hedo kalaqate looso loosa hasiissannotano xawisino.
Kovidi pirotokoole wo’munni wo’ma gumulantinokki akatinni doorshu albaanninna doorshu barra leeltino gumulo aana de’’ama leeltinota fayyimmate ministere assitino keenonni buuxase egensiisino.
Dagoomu qorophanno gede doorshu albaanni doorshu boordenna deerra deerranko afantannori hajo la’annonsa bissa ledo ikkatenni ministerete loosu mini hedo kalaqate looso loosasi qummi assino. Dagoomu doorshu albaanninna doorshu barra leellishino kovidi pirotokoole biddissi gumulo wo’munni wo’ma kovidi pirotokoole wonshinokkihanna dagoomu giddo de’’ama noota keenotenni buuxino yino.
Dokter Tegene xawishshi garinni; doorshu barra afuunna sanote maaske wodhitinore la’’asi coyi’rino. Seedu dirinna mite mite basera anga hayishshi’nanni uduunne shiqishatenni angansa co’imma agadhitanna ministerete loosu mini lainota danchummatenni kayisino. Xeertinye agadhe uurra hooganna mite mite basera angate co’imma agadhinanni uduunni nookkitano huwantoonni yino.
Tenne odoo qixxeessini yanna geeshsha horrote korkaatinni ministerete loosu mine daggannoti reyatenna amadamate bikki mashalaqqe ajjanni afantanno. ikkirono anga aaninni fincamanno dhibba ikkasinni dagoomu de’’ama dihasiissannosi yaatenni huwachishinno.
Rewotenna amadamate bikki ajino korkaati xiinxallotenni buuxamannoha ikkasinni ministerete loosu mini xiinxallo asse gumuliro dagate xawo assanno yino.
Konni ledo amadaminohunni Itophiyu kittibaate aatenni dancha looso loossanni afantanno gobbuwa mereerinni gaamantannota qummi asse ; mittu diri giddo 20 Miliyoone (20%) dagase kovid-19 te horronni kittibaate afidhanno gede loossanni afantanno.
Tini odoo fultu yanna geeshsha fayyimmate ogeeyye, ledote xisso noonsari xaphooma umi doyichonni adha hasiissannonsa Mitte Miliyoone 987 qansootira kittibaate uynoonni.
Horrotenni rewote bikki kalqoomu deerrinni lexxasinni ‘’Astra Zeenika’’ yinanni kittibaate baxxinohunni Hinde gobbasenni fultannokki gede hoolasenni ministerete loosu mine kittibaatete shiqisho qarri xaadino.
Mootimma wole gobbuwanni doorsha horonsi’ratenni chayinunni Mitto xibbe kume kittibaate eessite shiqishote anje tira dandiitino; wolootuno muli yannanni e’anno.
Koroonu pirotokoole agadhitinokkiri mitte basera gamba yitinori dagoomu bissanna deerra deerranko afantanno massagaano sokka sayissanno yannara miidiyubba sayisatenni qorowama hasiissannonsa.
Wo’munni wo’ma dagoomu qoropho assanno gede kovid-19 te pirotokoole ministerete loosu mini sayisino biddissa loosu aana hosiissanno gede hattono daafurtukkinni hedo kalaqate looso loosa hasiissannonsa yaanni Dokter Tegene sokka sayisino.
Qiddist Gezaheny
Bakkalcho Ella 24 / 2013 M.D
