Abrahaam Saamueel
Addis Ababa:- Xintantunkunni sase diro ikkinoti Sidaamu Dagoomi Qoqqowi Ispoortete Federeshiine xaphoomu songo Lekkate Kowaase Federeshiine 2014M.Dna 2015M.D loosu gumulsha keenatenni songo hanaffino. Sidaamu Dagoomi Qoqqowi Woga, Turizimenna Ispoortete Biiro Sooreesi Kalaa Jaggo Agenyehu, Ispoortete Komishiine Komishiinerichi Kalaa Firewu Areera, Lekkate Kowaase Federeshiine Pirezidaante Kalaa Anbesse Abbebenna wolootu Ispoortete massagaanonna hajo la`annonsa bissa battalate leeltino.
Xaphoomu Songora Afii Fanote Hasaawa assinohu Sidaamu Qoqqowi Woga, Turizimenna Ispoortete Biiro Sooreessi Kalaa Jaggo Agenyehu; Federeshiine saiha sase diro dhukise aleenni ikkino looso loossinota xawise; albillichono konni aleenni hixamanyine loosa noota buuxisino. Ispoortete Komishiine Komishiinerchi Kalaa Firewu Areeri isi widoonni; Lekkate Kowaase Federeshiine xaa geeshsha ikkado baajeette gaammonniti nookkiha jawaata looso loossinota kule; wolootta qoqqowubbarano lawishsha ikkanno looso loossinota huwachishino.
Xaphoomu songo beeqqaanora saiha sasu diri giddo loosantino loossa lainohunni dokimenterete filmenni amadiisiinse beeqqaanote xawinsoonniha ikkanna; beeqqanono noonsa hedonna xa`mo hattono kaajjadonna laafa midaado badatenni albillicho xa leeltanni noo foonqe beeshshine roorino guma abbate konni ale jawaante loosa hasiissannota dhaantino. Federeshiinete sooreeyyeno beeqqaanotewiinni ka`ino xa`mora ikkado dawaro uyte, ispoorte gutunninna mittimmatenni ikkine loonsannita hasidhannoha ikkino daafira, baalunku buusamme loosa hasiissannonke yiino.
“Ispoorete Federeeshiine techo geeshsha qoteho uurritine irkissanni noonsa bissaranna uurrinshara wodaninni ikkino galata shiqishshe; albillichono ninke ledo ikkitine irkissinanninke yine hexxo assineemmo” yitino. Qoleno, Federeshiine albillicho lamu dirira Qoqqowu giddo noo lekkate kowaase godo`laanora qodho shiqishanno Oomeega Qodho Laashshitanno Uurrinsha ledo sumimmete malaate malaatissinota xawinsoonni.
Amadisiisantino odoonni qoqqowu deerrinni addi addi ispoortete shaampiyoona Hawaasa harinsanni hee`noonni.2015M.D Sidaamu Dagoomi Qoqqowira addi addi ispoortete shaampiyoona sa`u muli barrubbara biifino garinni harissa hananfooni. Sidaamu Qoqqowi Ispoortete Amaale Mini qixxeessonni diru dirunkunni qixxaabbannoti tini addi addi ispoortete shaampiyoone quqquxamatenni agarrannitenna haammata qoqqowunniti ispoortete maate beeqqaano ikkitanno shaampiyoone ikkitanna; Loggitu artefishaalete xawira heewo hanaffino.
Tini ispoortete shaampiyoone ispoortete godo`laano noonsaha addi addi ispoortete dandoo leellishatenna ispoortete maate mitte battalara xaadisate illachiishinota ikkitinohura kaajjinshe sunfannita xawinsoonni.Konni ispoortete shaampiyoonira 11 ale ikkitanno isportete daninni 36nku woradi beeqqaano ikkitanni afantanno. Heewo lekkate kowaasenni hanaffe addi addi ispoortete daninni godo`litannoha ikkanna; barraho Lekkate Kowaase heewonni Daayye Quchumi Hawaasi Quchumi ledo xaade lamunku mitte eo eessatenni taalo guminni jeefissino. Godo`le xaano suffe hadhanni nooha ikkanna; dagganno lame lamala geeshsha keeshshitannota Sidaamu Qoqqowi Ispoortete Federeshiinenni afi`noommo mashalaqqe kultanno.
Bakkalcho Badheessa 7, 2015 M.D
