Gaazeexu Odeessaanchinni
Mitte gobba Ispoorte gummaamenna suffinota ikkitanno gede hasiisiro qacale ooso pirojekituwatenni hanqanfe loosa hasiissannota handaaru ogeeyye amaaltanno. Konnira kayinni rosu minna hasiissanno baseeti. Korkaatuno, qacale ooso halaalaanchu dirinsanni afantanno rosu minna giddoonni ikkinohuranna ispoorte loonsanni base hattono handaaru ogeeyyeno mitteenni afantannohu rosu minnara ikkinohuraati. Konne huwatatenni Addis Ababu quchumi gashshooti Atileetiksete Federeeshiine rosu minna mereersatenni qacale ooso hanqaffino pirojekitubba hala’ladunni millisate loossa loossanni afantanno.
Konnira, Addis Ababu quchumi Atileetikisete Federeeshiine Jaanmeedunna Abbebe Biqili Istaadiyeemera qacale ooso hanqaffino pirojekitubba irkissanni afantanno. Quchumu gashshooti Federeeshiine qaaqquullu doorantino pirogiraamenni Wodiraadinna Sibiste Negaasi umi dirimi rosi minnara afantanno pirojekitubba irkissanni afantanno. Muli yanna giddono pirojekitubbate hanqafantannore qacale ooso filatenni rosu minna deerrinni heewo harisate mixo amaddinota Federeeshiine egensiissino.
Rosu minna deerrinni lophitanni noo pirojekitubba kiiro lossate harinsanni heewo Badheessu agani 2015M.D goofimarchinni hanafe harinsanniha ikkanna; filotenni anfoonnire ikkadda qacale ooso pirojekitetenni hanqafante qajeeltanno kaayyo injeessinannitano xawinsoonni. Konnirano shoole pirojekitubba Federeeshiine umise baajeettenni irkisate qixxaabbinota xawinsoonni.
Rosu minnara harinsanni heewonni bandanniris dirinsa 13, 15na 17 woroonni noore ikkitanna; konni garinni bandanniri qacale ooso qajeelshaho e’annoha ikkanno. Quchumu gashshooti wedellunna Ispoortete qajeelshu kifile konni albaanni dirinsa 15 woroonni ikkinonsare hanqaffinota 4 pirojekite amaddinoha ikkanna; Federeeshiineno ogimmate irkonna harunso assitanninsa afantanno.
Pirojekitubba rosu minna deerrinni qajeelsiissanno gede Ispoortete sayinse rosiisaanora qajeelsiisaanote qajeelsha aateno balaxote qixxaawo gooffino. Quchumu gede Atileetikise pirojekitete deerrinni amadate sinu quchumma dandaa hoogansa kaiminni Federeeshiine xe’ne wonshatenni rosu minnara pirojekitubba halashshatenni Addis Ababa riqibbanno Atileetikisoota kalaqate hasi’noonnitano qummeessinoonni.
Qajeelshu heewo nookkiha gummaamo ikkannokkihura Federeeshiine quchumu deerrinni heewubba qixxeessate mixidhurono heewote ikkitanno base hoonge jifo ikkitinose. Federeeshiine, heewote dirinnino tonne heewubba harisate qixxaabbinoha ikkanna; rosu minnaha, Maaraatoonetenna sinu quchumma hattono eo gamba assate heewubba aantetenni harissannoha ikkanno.
Ikkollana, Addis Ababu Istaadiyeeme gatamarshu aana noohura hattono Abbebe Biqili Istaadiyeeme heewisammanni xawi nookkihura hasiissanno bikka wonsha hoogansanni heewisamaano gawajjantanno bidhattonni heewo harisate dandiitinokkita Federeeshiine xawissino. Konnira noo doorshino Itophiyu Ispoortete Akkaadaame ikkasinni heewo hakkiicho harisate gadachantannota xawissino.
Addis Ababu Atileetikisete Federeeshiine sooreette dukko Ihitaferrahu Gebre; Ispoorte mootimmatewiinni bande dagannita assate amandoonni ixo garinni irko gamba assate loossa loonsanni hee’noonni. Federeeshiine umise eonni massagamate assitanno wo’naalsha kaajjinshe sufisiisateno waatisera ikke kaa’lanni afamannohu Mooha shaqqado agatto faabrika ikkinota xawisse; ledote loossa loosateno babbaxxitino uurrinshuwa irko assitanno gede xa’mitino xa’mo dawaro afidhinokkita xawissino.
Atileetikse gobbate malaate ikkasenni dureeyye irko assitanno gede sokkase sayissino. Quchumaho haammata dureeyye nooha ikkasinni dureeyye hasiisanno garinni pirojekitubba amadde irkisa dandiituro Atileetiksete handaara gummaamo assa dandiinannita coyidhinoti sooreette; Ispoortete gangalantanni base qarrubba tirateno dureeyye Federeeshiinete waatira ikkite irko assitanno gede woshshatto assitino.
Bakkalcho Ammajje 30, 2015 M.D Hamuse
