Yaareed Geetaachew
Addis Ababa:- Sidaamu Qoqqowi Poolisete Komishiine “Marching Band” muli barra maassiinsannita xawinsi.95 Miilla hanqaffino muuziiqu gaamo Addis Ababaho afantanno Gargarooshshu Olanto Seesi-qalote loossa kolleejjera qajeeltanni afantannota Sidaamu Qoqqowi Polisete Komishiine Muuziiqunna Tiyaatirete Divizhiine sooreessi Kaa’laanchu Inspekitere Yoonaas Yoseeqo Bakkalcho Gaazeexira xawisino.Ka/Insp Yoonaasi xawishshi garinni; Qoqqowu Muuziiqu Gaamo “”Maarchiing Baande” qajeelsha adhate filantinori balaxxe Konistabilete ba’lattonni qajeeltu gedensaanni Muuziiqu Ogimmanni albisa ikkitino Gargarooshshu kolleejjera qajeeltanni afantanno.
Sidaamu qoqqowi deerrinni umi yannara muuziiqunni qajeelte maassantanno “Marching Baande” Miilla kiirotenni 95 ikkitanna; lamu agani gedensaanni maassante daga latishshahonna bareendete kakkayissanno gede guuta egennonni fultanno yiino.Kollejje albisanna 1935M.D safantinota ikkasenna Sidaamu qoqqowi Polisete komishiine tenne albisa kollejjera miilla qajeelsi’ransa jawa kaayyooti yiinohu kayinni Gargarooshshu Olanto Muuziiqu Kolleejje Diine Shaambel Yooseef Yirsawuho. Maarching Baande daga latishshaho, Bareendettenna jawaantete kakkayissannota ikkasenni Qoqqowu tenne baande uurrisi’rate assitino kakkaooshshi naandanniho yiino.
Kollejje xaa geeshsha 1 kumi ale ikkitannore handaarunni qajeeltino ogeeyye maassiissinotano xawisatenni.Xaa yannara haaru garinni tantannoonnita Sidaamu qoqqowi poolisete Maarch Baandeno haaro kaarikulemenni kiironsa 95 ikkitannore qajeelsatenni maassiisate qixxaambonnitano Shaambel Yooseefi lede xawisino. Kolleejjete Seesi-qalote Loossa Dayirikitoreete Dayirekiterichi Koloneel Maaniyahilewal Taaddele isi widoonni; kolleejje Gargarooshshu olanto gobbaanni babbaxxitino poolisete maarchi baandera qajeelsha uytannoha ikkanna; muli yanna kawano Sumaaletenna Tigirayete qoqqowi poolisete maarchi baande qajeelsitino yiino.
Xaa yannarano Sidaamu qoqqowi deerrinni guuta ikkitino Maarch Baande qajeelsinanni hee’noonnita kule; Muuziqunna olanto mitte saantime lame suude ikkansanni babbaxxitino qoqqowunna gobboomitte hajubbara dagooma latishshaho hattono olanto bareendete kakkayisatenni agarranninsa qeecha fultanno miilla ikkansa lede coyi’rino.
Bakkalcho Ammajje 9, 2015 M.D
