Qiddist Gezaheny
Addis Ababa:- Tayxe dirinni Itophiyu giddoydi hasattose wonshidhe 32 Miliyoone kuntaala Qamade gobbaydi dikkora shiqishate dhuki nooseta Gobboomitte Maakiro Ikkonometenna Qamade Gobbaydi Dikkora Soyaate Komite buuxxinota Xaphoomu Ministirchi Makro Ikkonoomete Amaalaanchinna Ekispoortete komite qineessaanchi Ambaasaadder Girma Birru xawisi.
Xaphoomu ministirchi Abiy Ahimed (PhD); Wocawaaro 29,2015M.D tayxe arri gorsu Qamade latishsha Somaalete qoqqowira hanafisiisi yannara Itophiyu amadose soorritanno haaro dhagge fooliishsho giddora e’annota xawisinonkanni. Gobba sai dirinni hanaffe Qamade gobbaydinni eessa uurrissinota qummi asse; tayxe dirinni Miliyoonetenni kiirranni kuntaala Qamade gobbara soyaatenni haaro dhagge borreessiissannotano hattonni. Xaphoomu ministirchi worino gobboomu timo garinni Itophiyu Qamade gobbara soyaate looso Oromiyu Qoqqowi Baale Zoonera faajjetenni hanafisiisino.
Amanyootu aana afaminohu Xaphoomu ministirchi Maakiro Ikkonoomete amaalaanchinna Qamade gobbara soyaate gobboomitte komite qineessaanchi Ambaasadder Girma Birru; Itophiyunniti Qamade gobbara soyaate mixose dirinni gumulanteenna la’’asinni hagiidhinota xawisino. Itophiyu seeda dirrara gobbaydi kaa’looshshe assinanna keeshshitinota qummi asse; gobboomu soorro harunsine dhaggese soorranno Qamadete latishshi giddora ease xawisino. Mootimma Qamade halashshite laashshatenni harancho yanna giddo gobbaydinni e’anno Qamade gobba giddo laalchinni riqibbinota xawisino.
Xaphoomu ministirchi Gobboomitte Maakiro Ikkonoomete Qamade gobbara soyaate komitera uyno biddissinni; Itophiyu tayxe dirinni gobbara soyaate dandiitannoha Qamadete laalchi bikka xiinxallinanni gede assinoonnita xawisino. Konni garinni gobbaydi dikkora soyaate gobboomitte qineessaano komite, barrunni afi’ra hasiissannoha gobbanniha xaphooma laalchu bikka xiinxallatenni hasiisannohunni gatannoha 32 Miliyoone kuntaala Qamade gobbara soya dandiinannita buuxissinota kaysino.
Konninni harunse Qamade laashshitanno qooxeessubba bande gobbara sonkanni laalcho gamba assinanni hee’noonni yiino. Xaa geeshshano noo mashalaqqenni Sudaanenna Keeniya lede lee gobbuwara Qamade soyaate 3 miliyoone kuntaali sumimme aana malaatinsoonnita coyi’rino.
Kaa’looshshunna wolootu gobba giddo uurrinshuwa gobbaydinni hidhitannoha gobba giddonni riqibbanno gede Woxu Ministere widoonni 2.9 Miliyoone kuntaali sumimme aana malaatinsanni hee’noonnita kayisino.Kunino loojistiksetenna gobbaydi soorro gatisatenni aleenni ledote eo abbitinota xawisino.Ambaasaadder Girmi ledotenni; Qamade gobbaydi dikora soyate loosi gumulamanno gede Gobboomitte komite illacha tugge loossanni afantannota qummeessino.
Bakkalcho Ammajje 9, 2015 M.D
