Amsaalu Felleqe
Addis Ababa:- Rosaanote gumanna amanyoote woyyeessate balaxote rosira jawa illacha tunge loonsanni hee’nonnita Sidaamu Qoqqowi Rosu Biiro egensiissu. Qoqqowu Rosu Biiro Laynki Sooreessinna Rosa, Rosiisatenna Keenote Handaari Sooreessi Kalaa Taaffese Gebremaariyam Itophiyu pireesete uurrinshara xawisino garinni; ‘’gobbate gede ikko qoqqowinke gede rosaanote guma uwinowiinni kaysanna rosu hiiqqamme taashshate jawa illacha tunge loosa yanna uynannikki hajooti’’ yiino.
Tayxeeha 12ki kifile rosaano guma lainohunni gobboomu deerrinni tittirotenni la’noonniha ikkanna Sidaamu qoqqowi deerrinni dayno gumano la’’ate dandiinoonni garinni borreessamino gumi rosu isilanchimmanna rosaanote gumi noo deerra faajjetenni leellishannoha ikkasi coyi’rino. Rosaanote gumi woffi yaanno gede baca korkaatta heedhanno yiinohu kalaa Taaffese; kuri korkaatta mereerinni rosaano balaxote roso garunni harunsitukkinni hattono nabbawatenna borreessate dandoo nookkiha umikki kifile eanna rosu minna deerransa agartinore ikka hooga ikkinota kule; qoqqowu deerrinni rosu minna deerra woyyeessatenna balaxote roso kaajjishate jawa illacha tunge loonsanni hee’noonnita egensiisino.
Balaxote rosi minna halashshatenna deerransa agartinorenna rosatenna rosiisate injiitinore assateno babbaxxitino dagoomu bissa beeqqo kaajjishatenni mootimmate waatira ikkite halantanno gede assinanni loonsanni hee’noonnitano xawisino. 1ki–3ki kifile rosu deerrira noo rosaano afoonsa tidhitino afiinni nabbawatenna borreessate dandoonsa woffi yitinota buunxoonni yiinohu kalaa Taaffese; baxxinohunni 2ki kifile rosaano mereerinni xibbuunni 70% ikkitannori nabbawa dandiitannokkire ikkansa kayse; kuri rosaano harancho yanna giddo nabbawanna borreessa dandiitanno gede illacha tunge loonsanni hee’noonnita qummeessino.
Rosaanonniha nabbawatenna borreessate hattono shallagate dandoo lossate mootimmate deerrinni sasu diri mixo qixxeessine loosu giddora e’noonniha ikkanna; konnira, rosiisaanote egennotenna ogimmate dhuka hattono rosu minna deerra woyyeessano agarrannita buuxisino. Rosu minna deerra woyyeessa rosanna rosiisate loossara injiitanno gede qeechise luphiima ikkinota xawisinohu Biirote laynki sooreessi; balaxote rosinni hanafe deerru deerrunkunni noo rosi minna deerra woyyeessate ragaannino illachunni loonsanni hee’noonni yiino.
Bakkalcho Ammajje 9, 2015 M.D
