Abbebech Maatewoos
Addis Ababa:- Itophiyu gobbaydi xaadooshshe kaajjishate qaru gambooshshinni qoteho babbaxxitino gobbuwa massagaano ledo horo noosiha dipiloomaasete loossa loonsannita Gobbaydi Hajo Ministere egensiissu. 42ki Afriku Mittimma loosu gumulsiisaano amaale mini gambooshshe bero hananfoonni. Gobbaydi Hajo Ministere 36ki Afriku Mittimma massagaanote gambooshshenna 42ki Afriku Mittimma loosu gumulsiisaano amaale mini gambooshshe lainohunni Gobbaydi Hajo Ministere qaalu saysaanchi Ambaasaadder Melles Alem Maakisanyote barra odeessaanote uyno xawishshinni; tayxehu Afriku Mittimma massagaanote gambooshshi “Afriku Co`icha Daddalu Qooxeessi Loossa Ollaha Assate” yaanno massagote hedonni harinsanni.
36ki Afriku Mittimma massagaanote gambooshshira 51 gobbuwanni riqiwantinori gaamo afantanno. Tayxe gambooshshino diru tuqa harinsanni rosicho ikkikkinni miilla gobbuwa gambooshshu aana duuchu dagoominna lamooshshu dipiloomaasete xaadooshshi ragaanni malamatenni dagoomitte horonsa buuxisate horonsidhanno gede xawisino.
Ambaasaadderchu xawishshinni; gambooshshu Addis Ababa Afrikunnita dipiloomaasete quchumimmase kaajjishannoho. Qaru gambooshshinni qoteho babbaxxitino gobbuwa massagaano ledo Itophiyunniha gobbaydi xaadooshshe kaajjishate horo noonsare diploomaasete loossa loonsanni. Gobba wolootta gobbuwa ledo nooseha lamooshshu xadooshshe kaajjishate loossanno. Itophiyunna Afrikunniha haanja latishsha halashshatenni kalqoomu deerrinni leeltanno qarrubbara tiro ikkitanno hajubba aana hasaabbannonna Itophiyuno rosicho beekkannoha ikkanno. Afriku daga Afriku qarrira Afriku tiro heedhanno gede assitino irkorano galatu shiqanno. Ambaasaadder Melles xawishshisinni coyi`rino garinni; 42ki Afriku mittimma loosu gumulsiisaano amaale mini 8/2015M.D hanafe lame barubbara sufannoha ikkanno. Massagaanote deerrinni qole Ammajje 10/2015M.D hanafe lame barrubbara harinsanni.
Gambooshshe ikkadu garinni jeefisate Itophiyu mootimma widoonni hasiissanno balaxote qixxaawo assinoonni. Halantimo Mootimmuwa Uurrinsha labbino uurrinshuwa hala`lado dipiloomaasete loossa loosantanno gede kaayyo kalaqqanno. Ogeeyyete deerrinni harinsanni gambooshshuwanni Itophiyu jawaata beeqqo assitanni afantanno yiinohu Ambaasaadderchu; baxxino garinni qixxaawo assitanni nootano coyi’rino.
Aantanchu Xaphoomu Ministirchinna Gobbaydi Hajo Mnistirchi kalaa Demmeqe Mekkonnininni massagantannoti Itophiyu gaamo beroonni hanafe beeqqa hanaffanno gede xawiseno; kalqoomu uurrinshuwa gambooshshe horonsi’ratenni lamooshshunna duucha dagaha dipiloomaasete xaadooshshi ragaanni kaajjado hasaawa assitanno yiino. Gambooshshu sai diriha mixo keenanno; dagganno yanna ajuujanna mixo aanano hasaawa assannoho. 35 gobbuwate massagaano, 11 gobbuwati Gobbaydi hajo ministerooti, 4 Xaphoomu ministerooti, 13 balaxaano mootitte, Halantino Mootimmuwa Uurrinsha lede 10 kalqoomu uurrinshuwa loosu sooreeyyenna 6 Afriku Mittimma miilla ikkitinokki gobbuwa gambooshshu aana beeqqitanni afantanno.
Bakkalcho Ammajje 9, 2015 M.D
