Amsaalu Felleqe
Addis Ababa:- Yirgaalamete quchumira eo gamba assate hayyo woyyeessatenni sai amandoonni baajeettete diri umikki boci dirira uurrinshu eo mixote aleenni gamba assa dandiinoonnita Quchumu Gashshooti Eote Biilloonyi Sinu Borro Mini egensiisi.
Quchumu gashshooti eote biilloonyi sinu borro mini sooreessi kalaa Siidamo Kimmiso, Itophiyu Pireesete Uurrinshara xawisino garinni; quchumaho eo gamba assate hayyo woyyeessatenni amandoonni baajeettete dirinni sai 6 aganira 77.2 miliyoone birra eo gamba assate hende 76.4 miliyoone birra eo gamba assa dandiinoonni. Kunino, gumulshu xibbuunni 99% ikkinota egensiisino.
Quchumunniti eote bue uurrinshunninna maazzagaajju mininni ikkinota kulinohu kalaa Siidamo; sai 6 aganira uurrinshu eo 63.7 miliyoone birra eo gamba assate hende 65 miliyoone ale birra gamba assa dandiinoonni. Kunino mixote aleenni gumulloonniha ikkasi coyi’rino.
Gamba assinoonni eo giddonni maazzagaajju miniti sai 6 aganira 13.4 miliyoone birra eo gamba assate mixi’ne 11.4 miliyoone eo gamba assa dandiinoonnitanna mixote gumulshi xibbuunni 85% ikkinota xawisino. Eo gamba assate harinshonni sai 6 aganira sae sae kaphu darrasanya horoonsi’ratenni moorunna bainchu assootinni angansa noonsare 2 ogeeyye aana seerunna gashshootu qaafo adhinoonnitano sooreessu lede xawisino.
Quchumaho eo gamba assate hayyo yannitte assate looso loonsanni hee’noonnitanna xaa yannarano wo’munni wo’ma baankete widoonni eo gamba assate widira e’nanni hee’noonnita xawise; giwiru baataano giwirensa baankete eessite darrasanya shiqishshanni billoonyunni owaante afidhanno gede assa dandiinoonnita coyi’rino.
Wole widoonni, quchumaho owaatamaanote darrasanya uytannokkire 10 daddalu uurrinshuwa aana gashshootu qaafo hattono 2 uurrinshuwa aana seerunni qaafo adhinoonnitano hattonni.
Bakkalcho Ammajje 2, 2015 M.D Hamuse
