Amsaalu Felleqe
Bishooftu:- IFDR Qara Odiitere (Qorqorshu) uynoonnisi sokko garunni fula dandaanno gede Dagate riqiwamaano amaale mini irkonna kaa’lo hasiissannota Qara Odiitere Meseret Daamxe xawissu. Dagate riqiwamaano amaale mini babbaxxitini uurrinsu komite gambisaanonna massagaano; Tsere-mussinnu komishiine; Pilaanenna Latishshu ministere; hattono woloottu hajo la’annonsa bissa beeqqaano ikkitino hasaawu battala tenne lamalara lamu barrira Bishooftu quchumira harinsoonni.
Hasaawu bare, Dagate riqiwamaano amaale mini miilla Qara Qorqorshu loosu mininni shiqqannota Odiitetenni iillinoonni ripoortuwa kaima assatenni gumulsiisaano bissa aana harunsonna qorqorsha assate illachishshinota ikkase Qara Odiitere Meseret Daamxe; baxxinohunni Itophiyu Pireesete Uurrinshara xawissino.
Amaalete mini babbaxxitino uurrinshu komite gambisaanonna miilla hattono hajo la’annonsa bissa Odiitete loosu mini seerunna wodhote garinni loosate gara ikkado huwanyoote afidhannonna uurrinshate loossa irkissannonna kaa’litanno gede assate hende qixxeessinoonni bare ikkase coyidhino. Baxxinohunni miinjunna dagoomitte latishshira gaammanni bejete hasiisanno illachira calla hosa noosita Uurrinshate loosu mini yanna yannantenni Odiite assatenni ripoorte amaalete minira shiqishannota egensiissino.
Mootimmate woxu fulo gashshootinna qorqorshi hajubba uurrinshu komite hidhote, latishshu pirojekitubbanna womaashshu gashshooti ledo amadisiisaminohunni adhamoohshe hooginno garinni tumote dawaro qolloonniri odiitete ripoorte aana gashshootunna seeru garinni qaafo adhinanni gede biddissa uynoonnitano qummeessitino.
Sai dirira Federaalete 39 uurrinshuwara assinoonni odiitete ripoorte kaiminni uurrinshuwate odiitete ripoorte adhamooshshu nookkita ikkasenni Woxu ministere hasiissanno qaafo adhitanno gede raga worroonnitano coyidhino. Ledoteno, 41 uurrinshuwara assinoonni odiitenni iillinoonni gumi adhamooshshe afidhannokki gede assannonsaha ikkasinni adhinoonni qaafo borrotenni egensiissanno Farcote ministere mitte mittenta uurrinshuwa borrotenni xa’mitinotano Qara Odiitere Meseret Daamxe ledde qummeessitino.
Kunino. Odiitetenni iillinoonni ripoorte kaiminni gumulsiisaano bissa aana adhinanniti taashshote qaafo ragaanni woyyaambe nootanna leellishannoha ikkasi kulte; Qara Odiitete loosu mini Pilaanenna latishshu ministere, Tsere-mussinnu komishiine, Farcote ministerenna woloottano hajo la’annonsa bissanni ledo qinaawe loosanni afamannota coyidhino.
Bakkalcho Ammajje 2, 2015 M.D Hamuse
