Abbebech Maatewoos
Addis Ababa:- Gobbanke miinju dippiloomaase aana illacha uyte millisatenni gumaamma loossa gumulantanni afantanno yaatenni layinki xaphoomu ministirchinna gobbayidi hajo ministirchi kalaa Demmeqe Mekkonnin xawisi.
Gobbayidi xaadooshshi inistituute Wollo yuuniverisitenna Kombolchu quchumi gashshooti kantiiwi borro mini ledo halamatenni “Kaajjado miinju dippiloomaase islanchimma noosi suwashshu gobbayidi investimente timbiliqara” yaanno massagote hedonni Kombolchu quchumira amaale assitino.
Baretenni layinki xaphoomu ministirchinna gobbayidi hajo ministirchi kalaa Demmeqe Mekkonnininna Amaaru qoqqowi mootimma pirezidaantichi dokiter Yiliqaal Keffaaleha lede haammata mootimmate luphiima sooreeyye afantino. Bare hasaawunni faninohu Kalaa Demmeqe Mekkonnin; gobbanke miinju dippiloomase aana illacha uyte millisatenni wolootta gobbuwanna kalqoomitte uurrinshuwa ledo gumaamo miinji dippiloomaase ha`lamme kaajjishatenni horaameeyyimmase lossate loossanni afantanno yiino.
Gobbanke kalaqamu jironni baaraadhinota ikkiturono; laashshate dhukase lossite miinju handaarinni kaajjado heewisamaanchooti yaate didandiisanno yeeno coyi`rino. Konnirano mootimma illachunnita duuchanta handaarra yaano, giwirinnu, manufaakicheriingete industire, shiilo, turiizimenna informeeshin komunikeeshiin tekinoloojete handaarra miinjahonna tantanote reekko buuxora noonsa qeecha kaima assatenni addi illacha uyte loossanni afantanno yino.
Suwashsho investimente hala`litanno gede hasi`niro keerise agaraminonna habbaatise buuxamino Itophiya halaalsa lowontanni hasiisannoha ikkasi xawise; sa`u lamalanni hanafe Itophiyu ortodokisete tewaahidote amma`no mine kalaqamino qarri lowontanni huluullisannohonna luphiima busullenninna egennonni tira xa`mannoho yee huwachishino.
Amma`nonnita xintu wodho agaratenninna macciishshama noonsa huurubba adhatenninna tiro hasatenni macciishshammetenninna heewotenni co`o ikkino garinni annuwu hayonna eltonni hattono ammanaasinete wodanchanni Itophiyu ortodokisete amma`no mittimmase ayirrisantenna agarante suffanno yino kalaa Demmeqe. Konni gobbaanni polotikahono ikko wolootta hasattubbara horonsi`nanniha assate harinsho horontanni adhamooshshu noosikkita egensiisino.
Qarra iibbabbisha duuchunkura injiitanno doogo dikkitino yinohu layinki xaphoomu ministirchinna gobbayidi hajo ministirchi Kalaa Demmeqe Mekkonnin mootimma seerunni uynoonnise yawo garunni fultannotano buuxisiise; amma`note mini mittimmara baalanti bissa uminsa qeecha fultanno gede sokka sayisino.
Bakkalcho Ammajje 2, 2015 M.D Hamuse
