Gaazeexu Odeessaanchinni
Riqibbinonke dagara danchu gashshootinna latishshu qarri xa`mo dawarate loosa hasiissannonke yite Sidaamu Qoqqowi Amaale Mini Songaafitte Dukko Faantayye Kabbaditi xawissu Amaalete Mini miilla beronni hanaffe 10 barrira 19 doorshu mereershuwara afante riqqibbinonsa daga ledo danchu gashshootinna latishshu qarri aana towaanyonna hasaawa assitanni afantanno. “Hananfoonniha latishshunna danchu gashshooti loosi aana kaajjadonna laafa midaado badate dandiisiissanno mixo amadde Amaalete mini miilla loosu aana noota xawissinoti Songaafitte Dukko
Faantayye, dagoomunna miinju handaarranni loonsanni hee`noonnita loossa miillatenni harunsonna towaanyo assa hasiissanno” yitino. Ledoteno, owaante aate looso isilanchonna lifixinoha assate amaalete minira jawu dilaali noosehura, miilla loosu dilaalansa fula hasiissannonsata dhaantino.
Amaalete Mini layinki Songaafichi kalaa Zannawi Zarfu towaanyo lainohunni Amaalete Mini miillara sanade shiqishi yannara, woraddatenna quchummate gashshootira Giwirinna, Roso, Waa, Fayyimmate owaante, Dooggate iilladimma, Eo, Daddallunna industirete aana illachiinshe dagate ledo hasaawa assinanni; mashalaqqeno uurrinshu komitera shiqinshanni yiino. Loosantanni noo pirojektuwa towaanyo assinanni hee’noonniha ikkanna, iillinshoonni deerranna isilanchimmaseno hasiisanno garinni buuxo assinannita kulino.
Amaalete mini balaxote hasaawa harisi gedensaanni; mixosi garinni Qoqqowu amaalete mini miilla ledo ikke Qooxeessu Agarooshshinna Hawaasi Industire Paareke ledo waaxame Paarkete giddo loonsanni hee`noonni loossa towaanyo assino.
Sidaamu Dagoomi Qoqqowi Mootimma Amaale Mini Songaafitte Dukko Faantaye Kabbaditenni massagantino liuuke Qooqquwu Qooxeessu Agarooshshinna Hawaasi Industirete Paarke ledo waaxamatenni paarkete giddo loosantanni noo loossa towaanyo assitinoha ikkanna, Indusitire laalcho laashshatte, gobbaydi woxi soorro abbate, qoleno qansootaho loosu kaayyo kalaqatenni sa`e, qooxeessa daaffannokkinna gawajjitannokki garinni giddosiinni fultanno kemikaale wirro (recycle) asse horoonsi`ratenni horote aana hossanno gede assinoonni; hananfoonni loosi gutunni massaganna harunsa xa`mannota xawinsoonnni.
Amaalete Mini Qara Songaafitte Ayirrado Dukko Faantaye Kabbaditi coydhinonte gede, paarke ijaara qoqqowinkehanna gobbankeha miinja irkisate sa`e looso hasidhanno qansootira loosu kaayyo kalaqate jawa qeecha fulanni nooti dancha ikkiteenna, faafirikunni fulannohu ishinu ledo karsantino kemikaale diilallote gade daaffannokki gede assate fulanno ishine wirro horoonsi`rate gutunni loosa hasiissannonke yitino.
Wole widoonni Qoqqowu Qooxeessu Agarooshshi Uurrinshahu Qaru Dayrekterchi Kalaa Shittayye Yumurihu isi widoonni, Industirete paarkeno ikkito wolootu qoqqowaho ijaarroonniti industirra giddonni fultanno ishinu ledo karsantino kemikaale qooxeessa daaffannokki gede assate qooxeessu widira qolte duntannokki gede dandiisiissanno looso gutunni loonsanni hee`noonnita buuxisino.
Bakkalcho Ammajje 2, 2015 M.D Hamuse
