Amsaalu Felleqe
Addis Ababa- Sidaamu qoqqowira tayxeeha qinaawino laayyote latishshi looso ‘’Tekinolojetenni Yannoo’mino Laayyote Latishshi Jireenyinkera’’ yaanno massagote qaalinni Borrichu woradira Fullaasa Eldaada olliira hoyimbarra faajjetenni hanafoonni.
Tayxeeha laayyote latishshi looso basete leelle faajjetenni hanafisiisinohu Qoqqowu Laynki Pirezidaantichinna Rosu Biiro Sooreessi kalaa Beyyene Baraasi coyi’ranni; sa’u dirrara qoqqowoho loonsoonni laayyote latishshi loossanni bushshunna wayillasote agarooshshinni ledotenni gibirinnu laalchimma lexxitannni daggino.
Qinaawino laayyote latishshi looso haanju latishshira; diilallote akati soorro woyyaambera; laalchonna laalchimma lossatenna baatto halashshine loosi’rate horoonsi’nanni gede kaa’lannoha ikkasinni haja la’annonsa bissa qeechansa fultanno gede huwachishino.
Qoqqowu Irshunna Kalaqamu Jiro Latishshi Biiro Sooreessi kalaa Mesfin Qarre isi widoonni; qoqqowoho tayxeehu qinaawino laayyote latishshi loosinni 646 hooffaydi laayyonni 116 kuminna 384 hekitaare baatto latisate mixi’ne loosu giddora e’noonni yee; konni loosira 1.6 miliyoone daga beeqqitannota egensiisino.
Qinaawinohu laayyote latishshi loosi laalchimmate lophora noosi qeechira ledote Hawaasi garbi, Gidaawonna Abbaayyu lagga hoshooshame marino bushshinna sabbunni wo’mitannokki gede gargaranno yiino.
Amadisiiseno, hananfoonnihu laayote latishshi loosi isilanchimma noosinna mixote garinni gumulamanno gede daga hasiissanno beeqqonsa garunni fula hasiisannotano sokkasi saysino.
Arfaasa 25, 2015 M.D Hamuse
