Qiddist Gezaheny
Addis Ababa:- Federaalete mootimma widoonni nooti keeru murci’raanchimma lowo geeshsha xaggeeffantannitenna gumulsateno fultanni noo qeechi luphi yinoha ikkasi albi Tigirayete yannate gashshooti Tigirayete Jireenyu paarte meentu liige massagaancho xaa yannara Addis Ababu quchumi Nifaas silk laafto sinu quchumi sagaletenna xagichu qorqorshi borro mini sooreesste dukko Abeba Berihe xawissu.
Dukko Abeba Itophiyu Pireesete Uurrinsha ledo assitino hasaawinni; mootimma keeru sumimme malaatisasera albaanni daga olu korkaatinni gawajjantannokki gede halamaano uurrinshuwa ledo sagaletenna sagalennita ikkitinokki irko shiqishshanni keeshshitino. Kuni kayinni keereho noo murci’raanchimma leellishannoho. Xaano sumimme gumulantanno gede assate ha’nanni hee’noonni harinsho jawaachinshannite.
Dukko Abeba xawishshi garinni; Tigirayete daga assinoonninsa irkonni techora iillitino; konni gedensaanni hasi’nannihu keeru sumimme wo’munni wo’ma gumulante hasi’nanni garinni e’e fulte heeshshonsa hee’rate. Kuni ikkanno gede kayinni mootimmanna qoqqowu daga halante loosa agarantannonsa.
Tigirayete daga hiittenne Itophiyu qoqqowi teesaano gede keerunni e’e keerunni fultanno gede qara hasattono gufisantannokki gede lowo sharro assinoonni yitinnoti dukko Abeba; xaano ikkiro qara hasatto albiwa qolate assinanni sharro kaajjite sufa hasiissannoseta xawissino.
Shirenni hanafantinoti qara hasatto haaroonso techo Allamaxanna wo’munku Tigirayete qooxeessira caabbichu, wayinna sagalete kaa’looshshe iillinshanni hee’noonni. Xaginaatu uduunneno ikkiro woradda baalanta hattono Ayideri hospitaalera wonshinanni hee’noonni. Kuni lowo geeshsha galatisiisannoha, mootimmano sumimmete noose hajajamaanchimma leellishshannote yitino.
Wole widoonni, xa gamunnino ikkiro qoqqowoho keeru bubbe bubbissanni no yitinoti dukko Abeba; dagano olu daafira hasaawa agurte keeru daafira hasaawa hanaffino yitino. Tinino dancha hedeweelcho ikkasenni gumulantanni noore safote latishshinna wirro gatamarate loossa dagano dandiitu bikkinni kaa’litanno gede horonsira hasiissannota qummeessitino.
‘’Xa Tigirayete daga keeru daafira hasaawa hanaffino; hasaawa calla ikkikkinni aantete kaayyo daafira mixi’ra hanaffino. Konnira tenne dancha hedeweelcho horonsiranna mootimma qoqqowu daga hale assidhe gattino loossa rahotenni jeefisa, dagano horonsiraano assa hasiissanno’’ yitino.
Kunni gobbaanni qoqqowoho noohu ga’labbote akati wo’munni wo’ma raga amadinoha ikkinokkihura daga bidhattotenni fulte keerunni loosonsa loosidhe e’anni nookkita kultannoti dukko Abeba; kunino qole loosantanni noore safote latishshuwa wo’ma ikkitannokki gede kaa’looshshu shiqisho loosino gufisamanno gede assannoha ikkasinni mootimma konni widoonni noo loossa garunni loosa hasiissannoseta huwachishshino.
Dukko Abeba xawishshi garinni; daga keeru bidhattonni fulte wo’mu keeri buuxisameenna wolootu qoqqowubba daga gattukkinni qoqqowu hedotenni, keerunninna loosunni latanno gede assa hasiissannonsa. Baalanti Itophiyu daga qoqqowo hadhe daga kaa’litannonna jawaachishshanno gede doogonsano bidhattotenni co’o ikkite fa’nama noose. Konnira qarunni jawa halantinoti Itophiyu daga anga Tigirayete dagara hasiissanno; calla loonsanni loosini lowo xeertinye ha’ra didandiinanni yitino.
Arfaasa 25, 2015 M.D Hamuse
