Abbebech Maatewoos
Addis Ababa:– Manaadda kofattora gorsu latishsha kaajjishanna caabbichu wolqa doorsha halashshate loosi kaajje sufara hasiisannota Xaphoomu ministirchi Abiy Ahimed (PhD) huwachishi. Bejetete dirihu umi lewu agani gumulshi keeno Xaphoomu ministirchi Abiy Ahimed afaminowa ‘‘Gebeta Lehager’’ biso ikkino Halaala Keellaho keeno harinsoonni. Keenotenni qara qara maakiro ikkonoome buuxissannorinni borreessinoonni gumma Itophiyu sufattora noonsa lopho jawa hexxo amaddinota ikkase leellinshoonni.
Konninni, gorsu latishsha lede wolqate handaari, gobbaydi daddali hattono shiilotenna wolqate handaarinni hananfoonniti latishshu loossa jawaachishshannota ikkansa xawinsoonni. Bejetete dirihu umi lewu agani maakiro ikkonomete gumulshi leellishshanno garinni dirunnihu Itophiyu ikkonoome lopho xibbuunni 7.5% ikkannota agarranni. Keenotenni loosu biddissanna sufote raga worinohu Xaphoomu ministirchi Abiy Ahimed (PhD); duuchunku handaarinni hananfoonniti jawaachishshannoti latishshu loossa kaajjite sufa noonsa yiino.
Wayinna Wolqate Ministerehu lewu agani gumulshi duushshanno gumi leellinoha ikkasi xawisinohu Xaphoomu ministirchi; aantete baxxinohunni shiimmaadda koffara gorsu latishsha kaajjishanna caabbichu wolqa doorsha halashsha hasiissannota huwachishino.
Qansootunniha anganni way hasatto hasi`nanni bikkinni qolanna woyyino looso gumula aantete illachi raga ikka noositano coyi`rino. Gorsunna Gammoojjitte Qooxeessubba Ministere lewu aganinni 48 kume way paampuwa eessatenni gorsu loosira aliidi qeechi noositano qaagiisse; kunino sufa hasiisannota huwachishino.
Sufotenni gorsu piroojekitubba amandoonninsa yannanni jeeffanno gede irkisatenni aleenni qooxxeessubbate manaadda gorsu kofatto loosate aana illachisha hasiisannono yiino. Seeriweelo fultanno shiilubba qorqoranna gobbaydinni e’annore ijaarshu uduunnubba gobbate giddo laashshantanno gede loosano aantete illachu raga ikka noosi yiino
Daddalunna Qooxeessu Xaadooshshi Ministere sa`u lee agannara gobbate miinju lophora jawa qeecha fultinota qaagiisse; aantete waagu lexxo qorqoratenni ga`labbi yino miinju amanyoote kalaqate loosa noosi yiino.
Sa`u lee agannara eo gamba assate ragaanni luphiima looso loonsoonnitanna xaphooma gobboomitte lopho ledo heewisiinsiro kayinni aja ikkinota xawise; seeriweelo daddalonna kontirobaandete millimillo qorqora; daddalu harinshora wodanchinannita haammata qarrubba tira hasiissannota coyi`rino. Bejetete dirinni lewu aganinni 1.5 miliyoone qansootira loosu kaayyo kalaqantinota xawisinohu Xaphoomu ministirchi; albirano ledote loossa hasiissanno yiino.
Giwirinnu handaarinni luphiima guma maareekkinoonnihu baatto loosidhe galtinore latishshaho kakkayisatenni kilaasteretenni loosatenninna tekinolooje horonsiratenni ikkinota xawisinohu Xaphoomu ministirchi; konninnino haammata gobbaydinni e`annota gidu laalchubba gobbate giddo laashsha dandiinoonnitaati coyi`rinohu.
Gobbaydi daddalo lossate ragaanni baxxinohunni bunu laalcho luphiimu deerrinni gobbaydira soyaamatenni seyoo maareekkinoonnitano buuxisiisino.
Arfaasa 25, 2015 M.D Hamuse
