Abrahaam Saamueel
Addis Ababa:- 40 ali hettisamaano poletiku paartuwa komishiinete ledo mitteenni loosate sumuu yitinota Itophiyu Gobboomu Amaale Komishiine Qaru Komishiinerichi Pirofeseri Mesfini Ariaya xawisi.
Pirofeesere Mesfini Ariaya Itophiyu Pireese Qixxeessitanno Zemen Maxaaficho ledo assino keeshshonni xawisino garinni; hettisamaano hattono gobba gashshite noo paarteno qoleno Doorshu Boordera borreessantinori 53 poletiku paartuwa giddo 40 ale ikkitannori hettisamaano paartuwa Komishiinete ledo loosate sumuu yitino.
40 ale ikkitanno hettisamaano paartuwa ledo loosate sumummete geeshsha iillate uminsati huluullo noonsa yiinohu Komishiinerichu, mitu mitu lallawa fushshini harinsho aana hattono Komishiinete su`mi aana xa`mo noonsata coydhinota kulino.
53 hettisamaano poletiku paartuwa giddo 40 ali ikkkitannori mittimmatenni loosate sumuu yitinoha ikkanna; muli yanna kawa sumimmete aana malaatissannota xawisino.
Pirofeeserchu Mesfini Ariaya, mittimmatenni loosate sumuu yitinokkiri 10 ali hettisamaano ledono loosate wo`naalsha assinanni hee`noonnita coyi`rino.
Komishiinete ledo loosate sumuu yitinokkiri hettisamaano poletiku paartuwa ledo xaaddotenni ikko wole widoonni xaandanni ninke ayee ikkinoommoro; loosinke mageeshshi geeshsha sufannoro hattono loosu qeechinke maatiro insara huwanyo kalaqate looso loonsanni hee`noommo yiinohu Komishiinerichu; ninke hasaawu looso injeessatenna qineessate ikkinnina gumulo uyneemmore ikkinoommokki daafira konne xawinsanni hee`noommo yiino.
Haammata daga widoonni adhamooshshu hee`rirono, mittimmate loosate hasatto leellishinokkireno, Itophiyu insarano gobbansa ikkinohura macciishshitinokkirenna hasidhinnokkiri boodeholla yine minshe badhera qolle diaggurreemmo yiino.
Ninke ledo sumuu yitinokkiri hettisamaano paartuwa albillicho doogo qinaabburo ga`a gobba massaggannorenna gashshitannore ikkitinohura; daga mimmitu ledo baxante heedhanno gobba massaga insarano jawa kaayyo ikkitinota ammanannota buuxisino.
Piroofeseri, Poletiku hettisamaano calla ikkikkinni siivilete maammarra uurrinshuwa; amma`note uurrinshuwa; gobbate geeri; bisu xe`ne noonsari maammarra; meentu maamari hattono kalqoomu maamarra riqiwamaano Ambaasaadderenna kalqete uurrinshuwa massagaano ledo xaadde hasaawissinotano huwachishino.
Pirofeeseri Mesfini, uurrinsinkunni honse agana ikkitinose komishiine adhamooshshi hala`lanni nootanna albllichono konni ale adhamooshshu hee`rannoti hexxosi ikkitinota coyi`rino.
Bakkalcho Arfaasa 18, 2015 M.D
