Qiddist Gezaheny
Addis Ababa:- Keeru sumimme gedensaanni Sivilete maamarra gawajjantino wirro gatamaranna uurrisate loossa aana mitteenni beeqqitanno gede Itophiyu Sivilete dagoomi uurrinshuwa amaale mini woshshatto assino.
Itophiyu sivilete dagoomi uurrinshuwa amaale mini Tigirayete noota mannihimmate, wirro gatamaratenna uurrisate hajubba lainohunni Tigirayete qoqqowira noo sivilete dagoomi uurrinshuwa ledo hasaawa assino.
Itophiyu sivilete dagoomi uurrinshuwa amaale mini Pirezidaantichi Dr Nigusu Leggese xawisanni; Tigirayete afantanno Sivilete maamarra ledo mitteenni halamme mannihimmate irkonna gawajjantino qooxeessuwa wirro gatamarate loossa gumullanni.
Konninnino, latishshunna irkote loosi aana dhuka afidhinori Sivilete maamarra uminsa sharro assa hasiissannonsata Dr Nigusu xawisino.
Keeru sumimme abbitino kaayyo horonsi’ne gobba gatamarate halamme loosa hasiissanno yiinohu amaalete mini pirezidaantichi; woxe gamba assatenni latishshu loossa gumulantanno gede, mannoomittete irko roorenkanni jawaattanno gedenna dagate mereero mottoo’ma bowirtanno gede sivikete dagoomi uurrinshuwa hananfoonni loossa kaa’la hasiissannonsa yiino.
Dr Nigusu ledotenni; amaalete mini keeru sumimme gedensaanni mootimma fushshitino seera harunsino garinni gumula hasiissannonsaha irkote looso lainohunni aantete tittirshunni gumulote mixo fushshatenni sivilete maamarra uurrinshuwa qinaawino loosira uminsa qeecha fultanno.
Tigirayete sivilete dagoomi uurrinshuwa waaxo boordete gambisaanchi kalaa Tesfaye G/Igizabiheeri isi widoonni; keeru sumimme gedensaanni Itophiyu sivilete dagoomi uurrinshuwa amaale mini massagaanonna miilla Tigiraye hadhe mitteenni loosate dandiisiisanno hasaawa assitinota xawisino.
Sivilete dagoomi uurrinshuwa dhukansa gamba assidhe mannihimmate irko, latishshahonna danchummate loosira hosiisa dandiitanno. Xaa yannara kalaqamino keere horonsidhe beeqqisiisaancho ikkino garinni irko shiqishatenni baqqi yitino beeqqo assa hasiissannonsa yiino.
Tigirayete sivilete dagoomi uurrinshuwa amaale mini qaru dayirektere kalaa Heenook Mellese isi widoonni; keeru sumimme mitteenni loosate dandiisiissanno kaayyo kalaqqino. Tenne kaayyo horonsirate dandiisiisanno hasaawa harisankenni aantete dagate qarra shotissanno hajubba aana halamme loonseemmo yiino.
Kalaa Heenooki xawishshi garinni; sivilete maamarra uurrinshuwa loosonsa qinaawino garinni gumula dandiituro olu yannara gawajjo iillitino qooxeessuwa gatamara dandiitanno wolqa noonsa. Ledoteno, keeru sumimme loosinke gummaa’mara roore dhuka kalaqannoha ikkasinni halammenke kaajjinshe sufa noonke yiino.
Amaalete mini gobbate sufo noo keerinna latishshu kaajjannonna qansootu irko afidhanno gede hananfoonni sharro kaajjite suffannota xawisino.
Itophiyu Sivilete dagoomi uurrinshuwa amaale mini 4 kumi ali kalaqamunna gobbaydi sivilete dagoomi uurrinshuwa qineessatenni loosanni afamanno.
Bakkalcho Arfaasa 18, 2015 M.D
