Addis Ababa:- Affini bude gobbate gede horote aana hosiisatenna kalqoomunniha assate handaaru fullahaano xiinxallotenni lossanna latisa hasiissannonsa yiino Hawaasi Yuniversite Pirezidaantete borro mini sooreessi kalaa Ayyele Addato.
Affini budi kipho tirranni woyte halaalanyu araari dagate giddo hee’ranno gede assannotano xawisino.
Konni ledo amadisiisaminohunni, Hawaasi Yuniversite tenne lamala giddo ‘’Keereho Gadachannoe’’ yaanno uminni keeru gambooshshe harissinoha ikkanna; Yuniversitete rosaano, rosiisaano, fullahaano, wedellu, budu geerrinna amma’note massagaano gambooshshu beeqqaano ikkansa borrote mini sooreessi xawisino.
Gambooshshu aana Affini bude sayinsetenna egennotenni irkinse horonsi’ra lainohunni ‘’Affinology’’ yaanno uminni xiinxallote borro shiqinshoonnita kayse; affino ilamatenni ilamanniwa taraabbanno gedenna wo’manta kalqe iillitanno gede egennotenna xiinxallotenni irkisse loossanno gede fullahaanote saynse uynoonni yiino.
Kalaqamanno qarra tirate, araarahonna dagate mereero baxillu hee’ranno gede ha’nuru budi hayyo horonsi’noommero gibbo diheedhanno yiinohu kalaa Ayyele; ‘Affinology’ xiinxallo galagalle budinkewa hingo yitanno sokka amaddinota ikkase xawisino.
Halaalu fuleenna suwashsho, hanqafaancho, halaalanyanna baalanka taashshitino farco afi’nannihu Affinotenni ikkinotano lede qaagiisse; konne bude egennotenni irkinse loonsiro kalqete jiro ikkara dandaannota coyi’rino.
Konnira ilama mimmito ayirrissanno gede, taalleenyu hee’rannonna halaalu ba’’annokki gede kuni budi kaajje sufanno gede assinanni xiinxallo mootimma woxunninna hasiisannorinni irkisa hasiissannota sooreessu lede huwachishino.
Qiddist Gezaheny
Arfaasa 18, 2015 M.D
