- 1.6 miliyoone ikkanno manni laayyote latishshi loosira beeqqaano ikkitanno
Addis Ababa:- Tayxehu laayyote latishshi loosinni 116 kume hekitaare baatto aana bushshunna wayillasote agarooshshi loossa loonsannita Sidaamu qoqqowi Irshunna Kalaqamu Jiro Latishshi Biiro egensiissu. Biirote sooreessi kalaa Mesfin Qar
Itophiyu pireesete uurrinshara xawisino garinni; qoqqowu deerrinni konni albaanni loosantino layyote latishshi loossanni bushshu shaqqadimma lexxitino. Bushshu hoshooshama ajinshoonni; hattono gooraamenna ilaalaame qooxeessubbara ledote irshu baatto afi’ra dandiinoonni. Laayyote latishshi loosi qooxeessunna
kalqamu agarooshshira ledotenni; laalchimma lossate loosi ledo qinaawanno doogonna loosu hayyo noosi yiino. Qoqqowu gede babbaxxitino laalo laashshate widoonni baxxinohunni, Yirgaalamete qinaabbino Agiro-industirete paarkera hasiissanno abukaadote laalo aana illacha assine loonsanni hee`noonnita xawise; baxxinohunni sai dirira gamba assinoonni laalchinninna qixxeessinoonni zayite gobbaydi dikkora soyatenni 5.5 miliyoone birre eo afi`noonniha ikkasinni haanju latishshinna duuchu dani sagalla mitteenni afi’rate ragaanni guma abbinanni hee`noonni loosooti yaa dandiinannita coyi`rino.
Amadisiiseno, mannunna saadatenni kikkisantannokki gede agarooshshe assinoonni lattino laayyubbara wedellaho loosu kaayyo kalanqanni he’noonnitano Kalaa Mesfiin buuxisino. Laayyote latishshi loosihu qaru illachi; umihunni, bunu latishshi loosooti yiinohu sooreessu; xaphooma 161 kume hekitaare bununni diwamino irshi noohura konne mitteenni amadisiinse loonsannita xawisino. Ikkinohura, geedhitinonna guma laaltannokkita bunu haqqe buqqinse hoolle mukkatenna haaro buna kaasate looso illachunni loonsanni yiino; kalaa Mesfini.
Qoqqowoho tayxehu laayyote latishshi loosira xaphoomunni 1.6 miliyoone ikkanno manni beeqqannotanna irkisannotano lede coyi’rino. Gammoojjitte qooxeessubbara shamme keeshshiishate baxxino illacha assine loonsoonni loossanni soorro daggino yiinohu sooreessu; Hawaasi garba lede Lokka Abbayyanna Gidaawu lagira eanno bushsha gargarate looso loonsannitano xawisino. Jeefoteno, dagganno lamalara faajjetenni hanafanno laayyote latishshi loosira hasiisanno irshu uduunne qixxeessinoonnita kule; loonsanni loosi sufo noosiha ikkasinninna kalaqamu jiro agarate; lattino baatto dagganno ilamara tareessate looso ikkinohura; daga kakkaooshshunni beeqqitanno gede kalaa Mesfini amadisiise sokkasi saysino.
Abbebech Maatewoos
Arfaasa 18, 2015 M.D
