Kiristoosi ilama mimmito giwatenna xixxiiwamate huxxa diigatenni; babbaxxitinori gamba yitannonna billaallite keeshshitinori mimmitinsawa gamba yitanno gede assitinote.
Tayxeha Mootichinkenna Xagichinke Yesuusi Kiristoosi ilama (Gannu) ayyaana ayirrinseemmo woyteno albinte gede Kaaliiqi hajajo wonshinanni ikka noosi. Konni albaanni afatennino ikko afa hoongetenni mimmitunni ledo koffi yiinohu araaramenna mimmito gatona yaanno ayyaana ikkara halchinanni.
Kalqenkera babbaxxitino mootimmuwanna yannate gedensaanni dagginoti gashshootunna laooshshu harinsho manchi beetti Kaaliiqi hajajo gobbaanni ikkanna hattono Maganunni addaxxa agure umisi wolqanni, egennonni, wolqasinni, jirosinni addaxxanna la’nanni yannara iillinoonni. Kuni kayinni, kalaqamu Kaaliiqi hajajo gobbaanni ikkanno gedenna baattote aana rumo dagganno gede assannoho. Kalaqamu baalu Kalaqaanchoho hajajama noosi.
Kalqete aana kalaqaminori ninke gobbarano dagoominke aana lowo daafanna gawajjo kalaqanna la’noommo. Lawishshaho, moolle, fayya, olu, mimmito giwanna shaa, manchi beetti ayimmasi korkaatinni gawajjama, darama, mimmito giwanna xixxiwama labbino ikkitubbanni lowo manni gawajjame Kaaliiqisi ilama barri ayyaana ayirrisate nafa shettote giddoonni saysinoti baalinkera xawoho.
Sa’u lame dirrara gobbankera ikkinohuno konneeti. Aliyye gobbanke qooxeessira kaino olinni mannu mimmitunniwa xaadikkinni; maate babbadantenna billaallite keeshshitino; heddinokkinna agadhitinokki garinni hedeweelcho tenne kalqenni baxxitanno gede kora ikkitino. Tiiu gawajjo iillitinonsarino kiironsa kulle gundannita dikkitino. Kuri baalu ledame manninke babbaxxitino ayyaanna garunni ayirrisannokki gede assinonsa.
Baxxinohunni, Aliyye gobbanke qooxeessira kalaqantino ikkitubba xaa yannara araarunni gumulanteenna babbadante keeshshitino maate mimmitinsa ledo xaada hanaffino; babbaxxitino ayyaannano albinte gede hagiidhitanni ayirrisate dandiitino. Dagoomitte heeshshonsano wirro danchu garinni hanaffino.
Kaaliiqi gibbotenna mimmito giwate huxxa diigeennna keeru gobbankera teesanni no. Maganu baattonke xaano lede hurso! Tayxeeha Gannu ayyaana ayirrinseemmo woyteno ayyaana ayirrisate geeshshira calla yine jille, uddi’nenna biinfe intanninna anganni calla ayirrisate gobbaanni Kaaliiqi rosiisinoha keerenna mimmitu ledo baxille, ayirrisammanninna mimmito qaanganni ikka noosi. Hiikkonni qooxeessirano hee’neemmori ayyaana ayirrinseemmo bissa mimmitinke mereero baxillenna danchumma kaajjisha noonke.
Dagoomu Kiristoosi ilama (Ganna) ayirrisanno yannara deama dihasiissanno. Kuni yaa, ayyaana ayirrinsanni woyte mini giddo loosi’nanni yannara hattono mini gobbaanni assinanni millimmonni giiranna hedeweelcho dano kalaqantannokki gede qoropho assa hasiissanno.
Kiristinnu amma’no harunsaanonni iibbino garinni ayirrinsanni ayyaanna mereerinni mittonna bayi’ra ikkinohu Kiristoosi ilama (Gannu) ayyaani albiidinke Qidaame barra Sadaasa 29ni ayirrisamanno.
Ikkinohura, ayyaanu ayirrisamanno yannara baxxinohunni giiratenna hedeweelcho danora erqecci assitanno ikkitubbanni dagoomu balaxe qoropho assara agarranni.
Dagoominke ayyaana ayirrisanno woyte mimmitunni ledo xaadanni; hagiirrunni saysate rosantino harinsho noo daafira mini giddoonni ikko gobbaanni babbaxxitino danora reqecci assitara dandiitanno ikkitubba heedhara dandiitanno daafira qoropha dibushshanno.
Mini giddoonni ikko mini gobbaanni ayyana ayirrisate assinanni millimmonna loossa wiinamunni gudate yine baxxinohunni elekitirikete caabbicho doogimale horonsi’ra dihasiissanno.
Ayyaanu mimmitunni ledo xaadisannohanna hagiidhine feeffante ayirrinsanniha ikkasinni babbaxxitino loossara kachaachammanni daafira duuchu garinni qorophine iibbinonna hagiirrunni wo’minoha Gannu ayyaana ayirrinsammora hasiisanno.
Tayxehu Mootichinke, xagichinke Yesuusi Kiristoosi ilama (Gannu) ayyaani baalinkera keerunniha, baxillunniha, mimmitu ledo baxammenna ayirrisamme sayinseemmohanna dancha kaayyoha ikkonke!
Bakkalcho Sadaasa 27, 2015 M.D Hamuse
