Yaareed Geetaachew
Cubbu ganye rosamiro gade ikke gatanno;biso assi’ranno. Xagicho rosino dhibbino hattonni rahe dihuranno. Mooruno rosicho ikkanno woyte biso assi’ranno. Biso assi’ranno gede assannohu shoshoggitino qaafooti. Xissote xagicho hakime uyitino garinni adha hoongiro hakku dhibbi hakkonne xagicho rosino daafira rahe dihuranno. Konni daafira kaajjado dokitoranna kaajjado xagicho hasi’rasi digattanno.Mussinnunna mooruno hattonni.
Itophiyu daga amma’notenni huxxantinote;Bayiru Quraaninnino ikko qullaawu maxaafino mooranna mussinna tiyy’re giwanno. Sambatu soodanno woyite huccattote minira,Arbe iillitanno woyte Juma’’aho Masgiida ha’rannokkihu kiirotenni ajanno yiniro kapho dikkanno Itophiyu giddo. Hiittino amma’note uurrinshuwa moorunna Mussinnu danchumma kultannoti dino. Ikkollana daga mooranna Mussinna biso assidhino bissa moorunni jallaagginoha labbanno. Korkaatuno biso assidhinoyya!
Bayiriidi Qullaawu maxaafi togo yaanno; “Bushu Manchi Farco shokkishate,maaxe muishsha adhanno” ( Lawishshu Maxaafa 17:23) aana. Addaho bushunna kakkachu godowasi baxannohu farco shokkishe muishsha adhanno;farco taaltinota ikkituro maminni moorannoyya! Konnira godowa wonshi’rate yine adhinanni muishshi jeefosi dancha ikkitannokki daafira qoropha danchate. Qullaawu maxaafi ledanni:- “sagale godowahooti;godowuno Sagaleteeti;lamunku mitteenni ba’anno” yaanno. Bas bade afano hoogummoro godowaho yine assinanniri baalunku hunannoha ikkasinna ba’’annota xawisateeti.
Isiliminnu amma’nonni Sheriyu wodho noosi. Konne lainohunni Fedraalete Isiliminnu hajo borro mine kipho gargarooshshi keerunna ga’labbote handaari sooreessi Haji Musxefa Naasirihu yaanno garinni;Quraanu mussinna adha agurina daddalo nafa safaroottohunni safarte hiri yaannota qummeessanno. Muishsha aanno manchino,aara injiishino dallaalinna doogo leellishinohuno Isiliminnu amma’nonni giira e’’annota kulanno. Ikkina duuchunku amma’nosi kaajjishannohu iimi hexxote gobbaraatina techo moora,muishsha adha mayira hasiissuyya! Eemaramanna kaaliiqa waajja hasiissannota tenne dagonni huwata faayya labbannoe.
Xagicho rosino dhibbira kaajjadu xagichinna jawaatu dokitorichi hasiisanno. Xaano hananfoonni mussinnu gaadira sammi yine rosamino garinni lawashshitte qaafo adha biso assidhanno gede assanno yitanno huluullo nooe. Chayinu mussinnu aana adhitino, techo gobbansara woyyaambe abbinota kullanni. Filippiinseno hattonni.
Eela woradaho moorinoha Zoonete abbine mootoonsa heedhuro,Zoonete hunonoha Qoqqowo abbine suunqiro Qoqqowoho he’miniha federaale lossiniro “Dixooqinona Wirrilla yiino” yinanni yaattooti.
Diru sai kiiro “mussinnu Gaado” yine mussinna gargarate barra calla ayirrisanna “Mussinna tiyyi’ne gimboommo” yaa gobba mussinnu,bainchu assootinna mooru dhiiginni hursitanno yee dihedeemmo. Konni ka’a 2020 M.dirinni mussinnu kayisanno canco,dagate iillanno gadado macciishshatenni maccanke fooliishshi’ra hasiissanno. Kayinnilla konne duduwo macciishshatenni fooliishshi’neemmohu mussinnanna mooru hattono bainchu loosinni huluullammeennna seeru allaalaano shiqishshino garinni yoote mini adhino qaafo rosiissannota calla ikkitukkinni “Laayinkita”! yite xaartanno qaafo deerri deerrinsanni waagansa adhitinota macciishshinummorooti.
Coyinke aana “Haaqee waajjine gonxikkinni digallanni! Yaanno Sidaamu maammaahanni. Techo alba rossino daga kakkayisate assoote abbite hembeelsitannonke yine qaafo adhatenni badhe hinganni yanna dilabbannoe. Korkaatuno federaalete deerrinni komishiine irkissannonna mashalaqqe buuxxanno komite uurrinsoonnihu konne assoote gargarate lawannoe.
Miteekke mittu mitto fojo’ya fushshannoe yee maaxannohu hee’ra dandaanno. Mashalaqqe aanna reqecci assa kayinni dagatewiinni agarantanno. Mootimmano mashalaqqe uyitanno bissara agarooshshe assa agarantannonsa yitanno hedo nooe.
Ikkireno ikkeenna mooraanchonna bainchu loosira reqeccaawinoha reqecci assinanni yanna xaati. Xagicho rosino dhibbi gede ikkitino mussanyoota baqqi assino. Mooraanchu aana baqqi assitanno qaafo adhine leellisha dagate harafote! Gobbateno fooliishshote! Bakkalcho Sadaasa 6/ 2015 M.D Hamuse
