Addisu Adoola
Addis Ababa: Sidaamu Qoqqowi 2013 rosu diri roso Maaja 30 jeefisate loonsanni hee’noonnita Sidaamu Qoqqowi Lay/ Pirezidaantichinna qoqqowu rosu biiro sooreessi Kalaa Beyyene Baraasihu xawisi.
Kalaa Beyyene Bakkalcho gaazeexira xawisino garinni rosu loosi kalqete xaaddino koroonu fayya korkaatinni gede’ne hanifinota qaagiisse, konni korkaatinni rosaano diru rosonsa guddukkinni gattannokki gede babbaxxitino loossa loonsanni keeshshinoonni yiino.
Sette kifile qoqqowu deerri fonqolono Ella 28-30 geeshsha aate yanna murroonnino Yiinohu Kalaa Beyyene,9 kifile rosi kayinni gede’ne hanafinohura jeefote fonqolo Woxawaajje 14-17 geeshsha uynanniha ikkanno yee konnira jawaata qixxaawo assinanni keeshshinoonnita xawise Ella 21-25 geeshsha sette kifilera akeekishshu fonqolo uynanni gedeno coy’rino.
Konni garinni sette kifile rosaanote fonqolo qixxeessine attamate aana hee’noonnita kaysinohu Kalaa Beyyene, dawarote woraqatinna rosaanote kaarde lawinore gobbate gobbaanni attamme abbinanniri baaluri attamame daye angankera e’e no yee, xa qixxaawo gumulamate widira higge hadhanni noo daafira yinoonni barra fonqolu aamamanno yine loonsanni hee’noommono yiino.
Koronu fayya rosanna rosiisate aana iillishino xiiwo daafira xa’mo shiqqinosihu Kalaa Beyyene, fayya rosu aana iillishino xiiwo shota ikkitinokkita xawise konne dandaate mootimma dagoomano milli assatenni dagate wolqa horonsi’ratenni jawa sharro assinoonnita xawise hakko kaiminni batinye kifilla, rosaanote barcimmanna saleedda saeno mittu diri giddo calla 6000 ikkitanno rosiisaano qaxaratenninna afuu maaskeno hirre rosaanote beehatenni xaaddino lowo mitiimma dandiinoonni ikkinnina koronu fayya kalaqqino hekko shiimate yinannita di-ikkitino yiino
Jeefoteno mooru rosaano kaa’la ikkikkinni ilama shaa xaphoomunni gobba huna ikkinohura moora baalunku effi’re rosu minnano rosiisaanono assitanno sharrora halamanno gedenna dagoomuno mooru yaa ilama shaa ikkitinota afe rosaano qoqqowu deerrino ikko gobboomu fonqolo buqqeensanni calla loosse sa’anno gede halama hasiissannota sokkasi saysino.
Bakkalcho Ella 10/ 2013
