Jimma:-‘’Doorshunni dimokiraase kaanseemmo; haqqu sirchono kaanseemmo; wo’manti kalqe doorshu barra kiphantanno yite agartanna ninke kayinni haqqu sircho kaanse baxille rosiinseemmo yaanni xaphoomu ministerichi Abiy Ahimedihu egensiisi.
Jimmu quchuminna qooxeessu teessaano jireenyu paarte dukkisse beroo barra harissinohu dirira leellinohu xaphoomu ministerichi Abiy Ahimedihu sayisino sokkanni ‘’ Wo’manti kalqe ninke doorshu barra kiphantanno yite agartanna; ninke kayinni haqqu sircho kaanse baxille rosiinseemmo’’ yino.
Wolaphitino Itophiya gatamarate hananfoommo loossa gumulatenni uurrissannonke wolqa dino yinohu xaphoomu ministerichi; Itophiyu daga amande Itophiyunnino sa’ne Afrikaho caabbicho abbineemmo yino.
Xaa yannarano Itophiyu mittimma agarsiisatenni sa’ne Afriku buuda Afriku hirre assate mixo amande loonsanni hee’noommo yino.
Itophiyu diigantannokki gede assa dandiinoommohu mittimmanke kaajjishi’ratenni, halamatenna mimmitu ledo macciishshamatenniiti yino.
Jireenyu paartennino ikko wolootta hettisamaano paartuwanni daganke moorannohunna caacceeshshannohu gobbateno elannokkihura Itophiyu tenne yannara hasidhannohu latishshasenna wolaphose buuxissanno paarte ikkinotano xawisino.
Doorshaho hettisantanno wolquwa Itophiya baxxannoha ikkiro; Itophiya owaatate qixxaabbinorenna mittimma agarsiisate loossannoha ikkiro dancha kaayyo halcheemmonsa.
Jimmu baxillu; keerunna mittimmate xawishshaati; Itophiyaho calla ikkikkinni Afrikahono lawishsha ikkino quchumaati yino. ‘’Itophiyu xaphoomunni Jimmu gede biifadonna haanja ikkitanno gede baalunku haqqu sircho kaasa hasiissanno yaanni sokkasi sayisino.
Jimmu xawishsha ikkinohu sase lekka barcumi baxillunniha; keerunna mittimmate tiro afi’rinota kulinohu xaphoomu ministerichi Abiy; Itophiyaho ikko wo’munku Afrikira keere halchino.
Bakkalcho Ella 10/ 2013
