Hawaasa:- Sidaamu dagoomu qoqqowi qara quchuma ikkinohu Hawaasinna qooxeessaho afantanno quchummara dagooma horaameeyye assitannoti babbaxxitino latishshunna dagoomitte owaantera hossanno pirojektuwa Hawaasi quchumi layinki kantiiwi kaa’laanchupirofeeserichi Tseggaye Tekehu xawisino.
K/p Tseggaye xawishshi garinni Hawaasi quchumi xaa yannara gobbbankera afantanno jajjabbanna wiinamunni lophitanni noo quchumma mereerinni mitticho ikkanna quchuma teessaanote loosi’ratenna hee’rate injiinoha assate jawa illacha tunge loonsanni hee’noonni yino.
garinnino Quchumahonna qooxeessaho afantanno quchummara xaphoomunni 1 biiliyoone ikkanno woxu fulonni loosantinota kolishshonna seesallichu kinchi doogga, xalala anganni wayi, fayyimmatenna rosu uurrinshuwa, gangalantanni base, hattono giddo doogganna labbinore dagoomaho horo uyitanno uurrinshuwaati loonse maassiinsoonnihu.
Hawaasi quchumi latishsha woloota qooxeessaho afantanno quchummara halashshatenni, quchumma mittimmatenni lophitannonna lattanno gede assateno kalqoomunna gobboomu lawishsha adhatenni pilaanetenninna mixotenni
irkinsanni hee’noonni yinohu layinki kantiiwi; xaa yannara Hawaasi quchuminna qooxeessaho afantanno quchummara loonse gudatenni daga horo uyitanno pirojektuwanni xaphoomunni 80 kume ale ikkanno manna horaameeyye assitannota egensiisino.
Hawaasi quchumi badooshshe ikkinohu Taaboori illaali dureeyye jironsa fulo assitannohann Investmente goshooshate biso ikkanno gede loonsanni hee’noonnitano kantiiwu xawinsno. Kaa’laanchu piroeeserchi Tsegaye Tukehu Itophiyu pireesete uurrinshara xawisino garinni; Hawaasi quchumi daa’’ataano goshooshasinni gedeenni mannu buqqeenna wodani giddo keeshshanno gede hattono wo’manta Itophiyu daga taalo haa’ranno gede batinye looso loonsanni hee’noonni. Yannaasinchu quchumi amado hedote giddo worino looso loonsanni hee’noonni.
Konninnino Hawaasi quchumi badooshshe ikkitinore jajjabba ilaalu base mereerinni mitto ikkinoha Taaboori ilala dureeyye latissanno gedenna xaphoomu ministrchi dokter Abiy Ahimedihu worino faasho garinni ‘’Gebeta Lehager’’ gobboomu pirojektenni taalo ikkino latishsha loonsanni base ikkitanno gede loonsanni hee’noonni yino. Aantaanchu kantiibi xawishshi garinni; quchumu wo’mante Itophiyu daga quchuma ikkatenni sa’’e daa’’ataanote base ikkasinni hala’lado investmentete looso loosatenni gobba horaameette assa hasiissanno.
Konninnino Taaboori ilaala lede Hawaasi quchumi qooxeessira afantanno jiro loosu aana hosiisate jawaata sharro hananfoonnita qummi asse; aanteteno duuchunku handaari looso loonsannita buuxisino.
Ella 3 , 2013 M.D
Amsaalu Felleqe
