Ingiliizete gobbara londonete quchumira mitteenni hee`ra rossino baasa gatigalla no. baalunkunni roore doobbuwa lowo geeshsha biiffannonna la“ate yorsiissannoreeti. Hakkurino la“ate ha`ranno manni baalu woxe aa hoogiro giddoodira eannokki gede hoollanni. Woxu noosikki manchi kayinni minesi woshshu buttu`li woy basu heedhusiro insa doobbichoho haa`re ha`ranno.
Konni daafira mittu manchi mitto buttu`licho haa`re ha`ri, giddora eihu gedensaanni doobbichoho uysi. Buttu`lichuno doobbichu anga laaxanni maarie yaate gede dadillu qaalinni woda hanafi. Doobbichuno buttu`lichoho marare goxannowa shiqqi asse agurisi. Sagale daggannosi woyte itannoha ite gatinoha haa`re massanni buttu`lichoho tuga hanafi.
Togootenni mittimmatenni godo`litanni mitte basera goxxanni lowo diro afoltu. Lowo diri sa“i gedensaanni hakku buttu`lichu xissame rey. Doobbichu kayinni goxinoha laweennasi sammi yiisi. Mittu barri gedensaanni doobbichu buttu`lichunniwa shiqe umiido gotti asse la“annoti reyno gede afi.
Hatte yannara jawa huuronni dewee`la hanafi, doobbichu agaraanchino kuni doobbichi ma ikkeetikka yee daanno woyte buttu`lichu reye afami. Reshsha kayse hunate shiqanno woyte doobbichu hoolisi. Doobbichuno shoole barra wo`ma sagaleno saga`likkinni buttu`lichu reeshshi mule ofolli. Shoolki barra kayinni doobbichu agaraanchi daye la“annosi woyte buttu`licho angasinni hanqafi`re umosi buttu`lichu aana irkise reye afami. Agaraanchuno lamunku reeshsha kayse mitte bale giddo madaarinsa.
Ooso! Danchummanna baxille amaddiniro wolqaataamu laafa, gaggaadaamu shooshanqa, bushu mararaancho ikkanno`nena bunshete looso loossinoonte.
Bue:- Yelijooch Maasaaddegiya Bilaateen Geeta Haruy Welde Sillaase
Bakkalcho Birra 24, 2015 M.D
