– Gashshootu 24 doogote projekituwa maassiisi
Addis Ababa:-2013 M.d baajeetete dirinni Addis Ababaho 2 kumenna 60 projekituwa loosante gooffinota Addis Ababu quchumi gashshooti layinki kantiiwa dukko Adaanechi Abeebeti xawissino.
Addis Ababu quchumira tenne lamala giddo babbaxxitino sinu quchummara gatamaarroonni 24 doogga maassote amanyooti aana layinki kantiiwite dukko Adaanechi Abeebeti xawissino garinni, jawaante nookkiiha guma abba di-dandiinanni. Gashshootu projekituwate gumulshira uyinonni jawa illachinni 2 kumenna 60 projekituwa jeefisa dandiinoonni.
Layinki kantiiwitte xawishshi garinni, baajeetete dirinni quchumu gashshootira uyinoonni 61 biliyoone birri baajeete giddonni 33 miliyoone kaapitaalete hosino. Projekituwa harancho yanna giddo goofansa loosu bushu assootinni co`icha ikkasi leellishanno yitino.
Quchumaho maassote aana noori haammata projekituwa Itophiyunnita jiroo`mate harinsho leellishshannoreeti yitinoti dukko Adaanechi, doogote projekituwa hodhishu bobbaasa islaancho assatenni ledote quchumu lophora jawu qeechi noonsa gede buuxisiissino.
Woloota projekituwa gatamaarshino amandoonninsa yanna giddo goffanni owaante uyitannota coyidhino. Doogote projekituwa rahotenni goffanno gede danna agarsiisate halantino teessaanora, Addis Ababu quchumi gashshooti dooggatenna billoonye massagaanonna ogeeyye, loosu tequaaraacootiranna qeechinsaha assitinno bissara galatase shiqishshino.
Addis Ababu quchumi gashshooti doogonna billoonye qara loosu harisaanchi injiiner Moges Xibebu isi widoonni, lame biliyoone birra ale fulo assinoonni xaphoomunni 37.6 kiilo meetire seendillenna 10 – 40 meetire geeshsha hala`linyu noonsa 24 doogote projekituwa gatamaarshi goofe barraho maassote iillinota xawisino.
Doogote gatamaarshi projekite giddonni 18tu Addis Ababu dooggate biiloonyinni loosantinore ikkansa egensiisino.
Dooggate loosama hodhishshu bobbaha agarsiisate ragaanni dagoomu xaadooshshuwa rahinoha assanno yiinohu injiiner Mogesi, addinni babbaxxitino dagoomu kifilla laalchonsa yannatenninna rahotenni iillishate dooggate gatamaarshi goofe fano ikkasi jawa horo heedhannosita xawisino.
Projekituwa 24 kolishsho doogga ikkitanna ledotenni 37.6 kiilo meetire seendilli noonsa. Projekituwate maasso qixxaawo aana quchumu gashshooti layinki kantiiwa Adaanech Abeebetinna wolootu jajjabba mangisitete loosu soreeyye leeltinno.
Abebech Maatewoos
Ella 3 , 2013 M.D
