– Seera agarsiisate gaado kulannohu ‘’Ye Isat Qelebet’’ yaamamino maxaafi maassamino
Addis Ababa:- IFDR Gargarooshshu olanto sayinsetenna tekinoloojete handaarinni qara qeecha fulatenni gobbanke agarranni Jireenyu birxichira iillisha hasiissannonsata albihu IFDR pirezidaantichi Dr Mulaatu Teshoomehu huwachishi.
Seera agarsiisate gaado kulannohu ‘’Ye Isat Qelebet’’ yaamaminohu Gargarooshshu Xaphishshu Biddishshinni qixxaawino maxaafino maassamino.
Albihu IFDR pirezidaantichi Dr Mulaatu Teshoome Gargarooshshu Olanto barra ayirrinsinna maxaafa maassiinsi yannara assino hasaawinni; Itophiyu dhagge eweli borreessino garinni yine kullannohu baara wido noo manchooti.
Dhagge borreessinoonnihu dhaggete anninni ikkikkinni wolu manchinniiti. Xaa yannara konni gobbaanni uminke dhagge uminke borreessanke jawaachisha hasiissanno loosooti.
Ilama mittu mittuwiinni haadhe gobba alba qolte qaafisiissanno gede dhagge qarunni hasiissanno. Borreessinanni dhagge ilama suwissannota ikka noose. Kuni ikkannohu albi annuwinkenni dhanchummannire adhine hasiisannokkire agurranni gobbate gatamarshi aana jawa kaa’lo assinummorooti yaanni Dr Mulaatu xawisino.
Dr Mulaatu; gargarooshshu uurrinshuwanke illacha tuga hasiissannohu keeraanchimmanke agarsiisate calla ikkikkinni saynsetenna tekinoloojetenni umose gatamarte handaaru eo kalaqqannore ikkitanno gede agarranni. Xaa yannara saynseno ikkito wolootta handaarra aana sarraaqantino sayinsete gumma kaiminsa gargarooshsheho.
Gargarooshshu saynsetenna tekinoloojete handaari gatamarshira qara qeecha fulatenni gobbanke hasi’nanni Jireenyu birxichira iillisha hasiissanno. Xaa yannara olu albi gede urdetenna wonqotenni ikkikkinni saynsetenna tekinoloojetenni ikkasinni handaaraho gargarooshshu hala’lado looso loosa noosi yiino.
Maxaafu maasso aana hasaawa assitinnoti Gargarooshshu Minister Dieeta dukko Maarta Luwiiji; Itophiyahonna dagate ikkitannota ammansiissanno qixxaawo aana afantanno olanto gatamarranni hee’noonni. Gobba sufisiisate olanto baattanni noo waagi hiittoonnino xawinsara dandiinannikkiho yitino.
Gargarooshshu olanto jawaantete bue daga ikkasenni dagate halamme gobbate keeraanchimma agarsiissanno yitinnoti Minister Dieetitte; gobbate keeraanchimma agarsiisate olu xawira sharrantanno olantote miillara galatu hasiisannonsa yitino.
Itophiyu dagara taaltino olanto gatamarranni hee’noonni yitinnoti Minister Dieetitte; olamme qeela calla ikkikkinni kalanqoonni ammansiissanno qixxaawonni ola xeertotenni qola dandaanno dhukanna qixxaawo noonsa olanto halashshine loonsanni hee’noommo.
Gargarooshshu olanto xiinxallote mereershi qodhaanchimmate hedo xiinxallo dayirektoreete dayirekterchinna maxaafu qixxaawo komite qaru qineessaanchi Koloneel Mulaat Dessaalenyi xawisanni; gargarooshshu olanto barra lainohunni ‘’Ye Isat Qelebet’’ yaamamino maxaafa qixxeessate mittu aganinna bocu yanna adhinota xawise; maxaafu Sase fooliishsho afi’rinoho yiino.
Maxaafu aana hedonsa uytinori mereerinni kaa’laanchu Pirofeesere Abebawu Ayyaalew; HWHT halallaho heedhe manifestotenni gobba diiganno assoote leellishatenni hedeweelcho dagginore ikkitukkinni kalaqaminsanni hanaffe amaddino manifestonni ikkinota leellishanno garinni jawa tittirsha amaddannokki gede assinoonniti wolootaho buqqeete xiinxallaanora kaima ikkitara dandiitannote.
Juntu bushsha laaxe kae wirro rosino olira mayra higinoro, olanto juntu gano hala’la uurrisate assitino sharronna Debre Siinanni qolte hiittoonni Tigiraye eessitinonsaro, muli yannanni sayikki doycho ola fantinotanna olanto adhitinota qolte gano iillishate harinsho ragu ragunkunni borreessine laynki kiironni nabbawaanote iillishate loonsanni hee’noonnita Koloneelichu coyi’rino.
Qiddist Gezaheny
Birra 17, 2015 M.D Hamuse
