Addis Ababa:- Qansootunnihu manihimmate irkono ikko agarooshshi yekkeerote shiqannoha ikkinokkita Mootimmate Komunikeeshine Owaante egensiissu.
Owaante bero hawarrisse fushshitino xawishshinni qansootaho hasiisannohu manihimmate irkono ikko agarooshshu yekkeerote dishiqanno.
Owaantete Ministirchi Dr Leggese Tullu xawisanni; mootimma qansootu hobbaate agarsiisatenna mannihimmate irko hattono hasiissannota safote latishshuwa shiqisho buuxisiisate bayriidi seerinni worroonni sokko garunni fulate murci’raancho ikkitinota egensiisino.
Amadisiiseno, qansootaho mannihimmate irkonna hasiissanno agarooshshe assa yekkeerote shiqqannokkita kule; labbanno akatubbanni Tigirayete dagara ikko duuchate qooxeessuwara qarru giddo afantanno qansootira mannihimmate irko wiinamunni iillishate mootimma hixamanyite loossanni afantanno yiino.
Irko hasidhano qansooti su’minni daanno gidenna xagga hiittenneno cancishaano gaamonni moorantanno gede mootimma difajjitanno yiinohu Ministirchu; irko tuqinsanni hee’noonni gara mootima garunni qorqorsha assitannotano xawisino.
Tini bayriidi seeri worroonni yawo ikkaseno kaysatenni; qansootu hobbaate agarsiisanna irko hasiissannonsarira mannihimmate irko shiqishate loossa duuchate qooxeessuwara gumullannita huwachishino.
Amsaalu Felleqe
Birra 17, 2015 M.D Hamuse
