Sidaamu Qoqqowi HWHT assootenna Galchimi gobbuwa iillishshanno hekko giwate dira tenne lamalara harisino.
Sidaamu qoqqowi pirezidaantichi gaadu aana leelle,ninke Itophiyu daga kiso dibanxeemmo; anga uyneno di-egenninoommo yaanni coyi’rino.
Hundinni hanafe diinu Itophiya diigara assinokki wo’naa’lshi dino yiinohu pirezidaantichu; Itophiyu daga mittimmanni qeelamino ikkinnina qeele di-egennino; techono addi addi garinni Itophiya diigate mite mite gobbaydi wolqubba HWHT horonsi’ratenni wo’naalsha assitinohano ikkiro xaphooma Itophiyu Daga mittimma assitino sharronni Juntu techo qeelamino yiino.
Reyno HWHT ufuuffe foole worate wo’naaltanni noo mite mite gobbaydi gobbuwa hekko Itophiyu daga mittimma fulle gobbanke aaninnianga’ne kayisse gobbanke ninkera agurre yitanno sokka saysate fulloommo yiinohu pirezidaantichu; konni gaadi sokka mite mite gobbaydi gobbuwaranna soqqamaasinesira iillitono yiino.
Pirezidaantichu ledoteno, Konni gedensaanni togoo gaadi hagiirreho calla fulleemmoha ikkanno yee; gobbate waaga baattanni kakkalantanni afantanno gobbate olu wolqaranna olantote qote uurritu Sidaamu Qoqqowi dagara galatasi shiqishino.
Hawaasi Quchumi Kantiiwi K/Pirofeesere Tseggaye Tukehu isi widoonni, dirrate annuwinke mundeenninna miqqanni keeshshitino oli dimittohona duuchaho; diinu ola albaanni qeela hooge olu hayyo soorratenni mito woyte miinju hamaamukko, wole yannara addi addi tuqu xaadooshshubbanni hattono godowi hosaanosi horonsi’ratenni kulle gundannikki jaddo iillishate wo’naalirono qeelloommo ikkinnina diqeelammoommo yaatenni;Ola faninonke diini umisi bushshino giiranni buluulo ikkate quuxxo aana noo gede coy’rino.
Fannoonninke ola kaaliiqi kaa’lonninna olunni be’e yitannokki cigilenni gudate widira reekkammoommo; xaano diino gobbankera hekko iillishate loosanno hamaamukko uurrisanno gede qaagiissate banxeemmo yiino kantiiwu.
HWHT marro marro gobbate aana fananno ola effi’ranno “Itophiyaho Uurreemmo; Huuro’ya Macciishshiisheemmo” yaanno massagote qaalinni massagamanno Hawaasi Quchimira harino dagate gaadinni babbaxxitino sokka diinaho iillitino.
Addisu Adoola
Birra 17, 2015 M.D Hamuse
