Addis Ababa:- Itophiyu pireesete uurrinsha qixxeessitinoti 12ki ‘’Itophiyu Daafira’’ yaamantanno paanaalete hasaawinna fotote reqecco Benishaangul Gumuzete qoqqowira Metekkel zoone Gilgel Beles quchumira harinsoonni.
‘’Latishsha Loosunni Itophiyu Daafira’’ yaanno birxichinni tenne lamalara lamu barrira harinsoonni bare aana Abbayi kofatto qara loosu harisaanchi Injiiner Kifle Horo hasaawu borro shiqishino.
Injiiner Kifle borrosinni; Itophiyu kalaqamu jironni baraadhinote; kayinnilla, tenne jiro garunni horonsidhukkinni seeda sanna kiirantino yaanni xawisino.
Gobba nooseti kalaqamu jiro mereerinni way jirose kullanite yiinohu Injiiner Kifle; Abbayi laayyonni calla xibbuunni 70% gobbannita way jiro amadinoho yiino.
Abbayi laayyo giddo noore lede roore anga ikkitannori Itophiyu lagga gottinaatu noonsa basenni du’nantannore ikkasanni baxxinohunni elektirikete caabbichi wolqara hossannoreeti. Kayinnilla, tene jiro garunni horonsi’ra didandiinoonni yiino.
Itophiyu wayinni calla 45 kume Meega Waatte elekitirikete caabbicho burqisa dandiitanno; konni giddonni kayinni xibbuunni 67% ikkannohu Abbayi laayyonni afi’nanniho yiinohu Injiiner Kifle; tenne laayyo latisa hee’ranna hoogate hajooti yiino.
Way anje luphi yite leeltanno qooxeessuwara noo qarrubba tirrannihu tenne way jiro latisanna horonsi’ra dandiinummorooti yiino Injiiner Kifle Horo.
Roorima lagganke danna tayisse sa’annore ikkansanni gobbuwa womaashsha afi’nannikki gede lowo sharro assitanno; konne calla ikkikkinni giddoydi hajubbankerano angansa wortanni hunote sokko adhite ola fantinonke yiinohu Injiiner Kifle; Itophiyu kayinni xaaddinose jiffa baala dandiite pirojekitete looso guddanni afantanno yiino.
‘’Loonseemmoti Abbayi kofo Afrikaho lawishsha ikkitinonna doogo leellishshino pirojekiteeti’’ yaanni kofo loosi yannara xaaddino jiffanna sa’noonni doogga seyoontenni ledo xawinsinohu.
‘’Afriku roduuwinkera doogo leellinshanni hee’noommo; hananfoonni loossa suffanno; kofonke jawa murci’raanchimmanni loonsantanni no; xaa yannara kofote xaphooma loossa xibbuunni 86.3% ale iillitino; lamenti Terbayne caabichu wolqa burqissanni no’’ yaanniiti Injiiner Kifle tittirotenni xawisinohu.
Mootimma murcidhe loosa hooggeemmero; pirojekite gufisate diinnanke loossino garinni ikkeemmero Abbayi kofo konni deerrira iilliteenna dila’neemmonkanni yiino kofote loosu harisaanchi.
Tini pirojekite konkiriitetenni calla ikkitukkinni Itophiyu qansooti mundeenni ledo loosantanni noo pirojekiteeti yiinohu Injiiner Kifle; ‘’Boobmbunni diiga dandiinanni’’ yinani waajjishiishate geeshsha iillinoonnite; loossate hasiisanno uduunni iillannokki gede dooggate aana iillinshanni guffannino sae siminto laashshinannikki gede faafriku qooxeessuwara maratenni canco kaysate geeshsha iillinoonni pirojekite ikkiturono; mootimma jawa illacha tugasenninna wo’mante Itophiyu qansooti sharronni konni deerrira iillitino yiino.
Labbanno pirojekitubba wolootta gobbuwara gobbuwate miinja jawa hembeelamme giddo tugginota la’noommo; Itophiyaho kayinni togoori dino. Korkaatuno, mootimmanna dagannita gutu pirojekite ikkitinohura jawa qorophonninna garunni massangeenna konni deerrira iillitinote yiino.
Amsaalu Felleqe
Birra 17, 2015 M.D Hamuse
