Addis Ababa:- Jireenyu widira reekkamate harinshonke jeefo gantannohu qarunni giddoydi dhukanke horonsi’ra dandiinummorooti yaanni Xaphoomu ministirchi Dr Abiy Ahimed coyi’ri.
Giddoydi dhukinke yaa daganke dhuka; gobbankeha kalaqamunna dhaggete jiro hattono haaro ilama kalaqote ogimmaati.
Konnira qaru korkaati boodu garinnino ikkiro noonkeha giddoydi dhuka garunni horonsi’rate ka’’ankeeti. Hiikkuri bissannino uynanninke irko giddoydi dhukinke aana lexxineemmoha ikkinnina qarunni lophonke bue ikkara didandaanno yiino.
Giddoydi dhukanke horonsi’ne Jireenyu widira reekkamate ha’neemmo doogo guffa nookkita dikkitino yiinohu Xaphoomu ministirchi; ikkollana, xaaddannonke jiffa baala sa’ne lophote deerrira iillate kaimunna injo baala angankera no yiino.
Miinju ganonna awaawurshi, mooraanchimmanna laalcho maaxa qara guffaati yee; gobbaydi dikkuwara soya hasiissanno laalcho maaxa; seerimale ikkino garinni gobbaydi woxu soorro harisana baatto seerimale hora lainohunni murci’ne qaafo adha hasiissanno hajubbaati yaanniiti xawisino.
Albillichono, xaaddanno jiffa sa’’a dandaanno miinja gatamara dandiineemmo gede lamu garinni sharro agartannonke yiinohu Xaphoomu ministirchi; kunino hunate woy latisate yee; miinju ragaanni leellanno awaawursha, mooraanchimmanna laalcho maaxate assoote hunate baalunku sharrama hasiisannota huwachishino.
Wole widoonni kayinni, eo ledanna fulo jawu garinni ajishate latishshu sharro agartannonke yee; kuri lamenti sharrote handaarra uminke polisenna uminke dhukinni lopha dandiineemmo assitannonke. Konnirano, lophonke injo angankera no yaanniiti lede coyi’rinohu.
Amsaalu Felleqe
Birra 17, 2015 M.D Hamuse
